Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 174 Hüküm no: 180 Orijinal metin no: [28b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saray nahiyesinden Istıranca köyü ile Terkos nahiyesinden Yayla köyü arasında dava konusu meranın Sultan Bayezid Vakfı’na ve Yayla köyü’ne ait olduğu Cennet-mekân hulled-âşiyân merhûm ve mağfûrun-leh Sultan Bayezid Hân -aleyhi’r-rahmetü ve’l-gufrân- hazretlerinin emlâk-i şerîfleri kurâsından Havâss-ı Refî‘a kazâsı müzâfâtından Terkos nâhiyesine tâbi‘ Paşayiğitler nâm-ı diğer Yayla nâm karyenin Vize kazâsına tâbi‘ Saray nâhiyesi müzâfâtından Istıranca nâm karye ile sınırlarında nizâ‘ olmağla mahall-i nizâ‘a varılıp mahallinde fasl-ı nizâ‘ ve husûmet olunmak için bi’l-fi‘l evkāf-ı mezbûre mütevellîsi olan fahrü’l-emâcid ve’l-ekârim Hamza Ağa yedinden bu dâ‘îlerine hitâben emr-i şerîf-i cihân-mutâ‘ vârid olmağın imtisâlen li’l-emri’l-âlî mahall-i memûre varılıp akd-i meclis-i şer‘ olundukda mütevellî-i mûmâ-ileyh Hamza Ağa tarafından da‘vâ-yı âti’l-beyâna vekîl olup bundan akdem hasm-ı câhid mahzarında Hüseyin b. Abdullah ve Ahmed Bey b. Kurd şehâdetleri ile şer‘an vekâleti sâbite olan fahrü’l-hutebâ Ömer Efendi b. eş-Şeyh Mehmed meclis-i mezbûrede, karye-i mezbûre Istıranca ze‘âmetine mutasarrıf olan fahrü’l-emâsil ve’l-akrân makbûlü’s-sudûr ve’l-erkân Mehmed Ağa b. Handan Ağa mahzarında bi’l-vekâle üzerine takrîr-i da‘vâ edip karye-i merkūme Yayla’nın kadîmî hudûdu Saruca yaydığı su sığırı ağılından dere inine ondan yalnızca pelit ağacına ondan Istıranca’ya giden tarîk-i âma ondan Turnalıgöl’e ondan Kumlucayol’a ondan Şebgâh kuyusuna ondan yokuş başına ondan Istıranca’dan gelen dereye ondan Savad deresine ondan yine Saruca ağılında müntehî olup hudûd-ı merkūme dâhilinde Alaton ve Palokaton nâm mahaller karye-i mezbûre Yayla’nın hudûdunda dâhil ve ahâlîsinin kadîmî mer‘âları olup dokuz yüz altmış senesi Cumâdelâhiresi’nin evâhiri târihi ile müverraha târih-i mezbûrede Havâss-ı Aliyye kazâsında müvellâ olan Mehmed b. Süleyman imzâsıyla ve ulemâ-i kibâr -rahimehumullâhü’l-azîzü’l-gaffâr- hazerâtı imzâları ile mümzâ ellerinde müte‘addid hüccetleri var iken müşârün-ileyh Mehmed Ağa’nın emri ile karye-i Istıranca ahâlîsi bi gayr-ı vech-i şer‘î zikr olunan mahallerin ba‘zı mevâzi‘in zirâ‘at edip ve ba‘zı mevâzi‘inde koyun ve hınzırlarını ra‘y ettiklerinden mâ‘adâ mûmâ-ileyh Mehmed Ağa’nın subaşıları ba‘zı zimmî tâifesinin akçelerini alıp koyun ve hınzırlarını kışlatıp karye-i Yayla ahâlîsini vech-i meşrûh üzre tazyîk ve vakf-ı mezbûra küllî gadr etmek murâd ederler suâl olunup karye-i Yayla ahâlîsinin ellerinde olan hücec-i şer‘iyye mûcebince zikr olunan Alaton ve Palokaton nâm mahallere karye-i Istıranca ahâlîsi müşârün-ileyh Mehmed Ağa’nın subaşıları müdâhale etmeyip min ba‘d vaz‘-ı yed etmekden men‘ ve def‘ olunmaları matlûbumdur dedikde gıbbe’s-suâl müşârün-ileyh Mehmed Ağa cevâbında, zikr olunan Alaton ve Palokaton nâm mahaller mutasarrıf olduğum karye-i Istıranca hudûduna dâhil değildir ve karye-i Istıranca ahâlîsinin vechen mine’l-vücûh alâkaları yokdur, lâkin karye-i Yayla ahâlîsinin mer‘âları olup tasarruflarında olan cibâlden mutasarrıf olduğum Istıranca ze‘âmetine defterde resm-i yaylak ve resm-i kışlak bir mikdâr akçe hâsıl kayd olunmuşdur deyip lâkin yedinde kavlini musaddık ma‘mûlün-bih sûret-i defter ve gayrı temessük dahi olmamağın hudûd-ı mezkûre dâhilinde olup zikr olunan Alaton ve Palokaton nâm mahaller müşârün-ileyh Mehmed Ağa’nın ikrârı ve karye-i Yayla ahâlîsinin yedlerinde olan hücec-i şer‘iyye mûcebince kemâ-kân cânib-i vakf-ı mezbûra hükm olunup mâ hüve’l-vâki‘ gıbbe’t-taleb ketb olundu. Tahrîren fî evâili şehri Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Ahmed Halîfe b. Bünyad el-İmâm, Receb Efendi b. Abdi, Abdi Çelebi b. ( ), Muharrem Çelebi b. Ahmed İncügezli, Sinan Bey b. Abdullah İncügezli, Mahmud Bey b. Ali, Malkoç b. ( ), Musa b. Abdullah, Şaban Beşe Serdâr-ı Saray, Mehmed b. Receb, Ahmed Çelebi Saraylı, Mehmed Çelebi b. İbrahim Saraylı, Mustafa b. ( ) ve gayruhüm.