Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 175 Hüküm no: 182 Orijinal metin no: [29a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Ali’nin dükkanını Mehmed b. Abdullah’a kiralaması Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Baba Haydar mahallesinde sâkin Süleyman b. Ali nâm kimesne mahfil-i kazâda işbu râfi‘ü’l-kitâb Mehmed b. Abdullah mahzarında ikrâr-ı tâm ve takrîr-i kelâm edip mahalle-i merkūmede vâki‘ bir bâb bakkal dükkânını mezbûr Mehmed’e târih-i kitâb senesi şehri gurresinden bir sene tamâmına değin on bin râyic fi’l-vakt fıddî akçeye îcâr ve teslîm eyledim ol dahi dükkân-ı mezbûru minvâl-i muharrer üzre bir sene tamâmına değin mezbûrü’n-na‘t on bin akçeye istîcâr ve kabûl eyledi ba‘de’l-yevm zikr olunan dükkân merkūm Mehmed’in târih-i kitâb senesi şehri gurresinden bir sene tamâmına değin dâhil-i taht-ı icâresi olmuşdur dedikde mukırr-ı merkūm Süleyman’ın vech-i meşrûh üzre cârî ve sâdır olan ikrâr ve takrîri el-mukarru lehü’l-merkūm Mehmed vicâhen tasdîk ve dükkân-ı mezbûru meblağ-ı mezbûr on bin akçeye istîcâr ve kabûl eylediğini şifâhen tahkīk edicek mâ hüve’l-vâki‘ gıbbe’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Receb Efendi b. Abdi, Mustafa b. Murtaza, Mustafa Beşe b. ( ), Mustafa b. Mehmed, Mahmud b. Ahmed, Mustafa b. Veli, Cafer b. Abdullah.