Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 176 Hüküm no: 183 Orijinal metin no: [29a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın bakkal dükkanındaki eşyaları ortağı Süleyman b. Ali’ye sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-’de sâkin bakkal tâifesinden Mehmed b. Abdullah mahfil-i kazâda işbu râfi‘ü’l-kitâb Süleyman b. Ali mahzarında ikrâr-ı tâm ve takrîr-i kelâm edip mezbûr Süleyman’ın medîne-i merkūme mahallâtından Baba Haydar mahallesinde vâki‘ mülk bakkal dükkânında mezbûr Süleyman ile bundan akdem ber vech-i iştirâk bey‘ ve şirâ eder idik hâlâ fesh-i şirket edip merkūm Süleyman zikr olunan bakkal dükkânını bana îcâr ve teslîm eyledikde dükkân içinde mevcûd olan eşyâdan kendi hissesine isâbet eden eşyâlar ve müteferri‘ayı bana yirmi bir bin akçeye bey‘ ve teslîm edip ben dahi vech-i meşrûh üzre iştirâ ve tesellüm eylediğimden sonra merkūm Süleyman meblağ-ı mezbûr yirmi bir bin akçeyi târih-i kitâbdan her bir hafta tamâmına bin beşer yüz akçe vermek üzre üzerime taksît eyleyip ben dahi minvâl-i muharrer üzre olan taksîti kabûl edip ve benim olan meblağ-ı mezbûr yirmi bir bin akçeden her bir hafta tamâmında bin beşer yüz akçeyi dâyinim merkūm Süleyman’a edâ ve îfâ etmeye müte‘ahhid oldum dedikde mukırr-ı merkūmu cemî‘ ikrâr-ı meşrûhunda mezbûr Süleyman vicâhen tasdîk ve meblağ-ı mezbûr yirmi bir bin akçeyi vech-i meşrûh üzre taksît eylediğini şifâhen tahkīk edicek mâ hüve’l-vâki‘ gıbbe’t-taleb ketb olundu. Fi’l-yevmi’l-âşir min Şa‘bâni’l-mu‘azzam târihihi’l-mezbûr. Şuhûdü’l-hâl: Es-Sâbikūn.