Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 177 Hüküm no: 184 Orijinal metin no: [29a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Ali ve Mehmed b. Abdullah’ın Todori v. Mihal’e borcuna kefil olunması Medîne-i Hazret-i Ebî Eyyûb el-Ensârî mahallâtından Baba Haydar mahallesinde sâkin Süleyman b. Ali nâm kimesne ve mukaddemâ mezbûr Süleyman ile şirketler olup hâlâ mezbûr Süleyman’ın müste’ciri olan bakkal tâifesinden Mehmed b. Abdullah mahfil-i kazâda işbu râfi‘ü’l-kitâb Todori v. Mihal nâm zimmî muvâcehesinde her biri ikrâr-ı tâm ve takrîr-i kelâm edip mezbûr Todori’ye bundan akdem müşterâ ve makbûzum olan otuz keyl pirinç ve kırk dört vakıyye kırmızı üzüm ve iki yüz seksen beş vakıyye fındık ve seksen dört vakıyye razaki üzüm ve doksan sekiz vakıyye nardenk ve bir def‘a dahi on altı kantar seksen lodra nardenk ve iki yüz otuz vakıyye asel ve yüz on iki vakıyye sâde yağ ve yüz kırk beş vakıyye sirke ve yirmi keyl tuz ve bir gaz otu ve iki zenbil ve bir fıçı ve yine üç fıçı ve bir bakır terâzi ve bir tuç vakıyye bahâsından on dokuz bin üç yüz elli dört akçe ve mezbûr Todori’nin ücretinden dahi bin üç yüz akçe ki cem‘an yirmi bin üç yüz elli dört râyic fi’l-vakt fıddî akçe bi tarîki’l-münâsafa mezbûr Todori’ye zimmetimizde lâzımü’l-edâ ve vâcibü’l-kazâ müşterek deynimiz vardır dediklerinde gıbbe’t-tasdîki’ş-şer‘î meblağ-ı mezbûr yirmi bin üç yüz elli dört akçeden mukırrân-ı mezbûrân Süleyman ve Mehmed’in her birine isâbet eden on bin yüz yetmiş yedi akçeye işbu hâzır bi’l-meclis medîne-i mezbûrede bi’l-fi‘l pazarbaşı olan Mustafa Beşe b. Murtaza emr ve kabûlü hâviye kefâlet ile kefîl bi’l-mâl olmağın mâ vaka‘a gıbbe’t-taleb ketb olundu. Târihuhü’l-mezbûr. Şuhûdü’l-hâl: Es-Sâbikūn.