Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 180 Hüküm no: 189 Orijinal metin no: [29b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mustafa’ya kalan mirastan Beytülmal’e kalacak hisse hususunda anlaşma sağlanması Husûs-ı âti’z-zikrin mahallinde tahrîri iltimâs olunmağın savb-ı şer‘-i kavîmden mevlânâ Receb Efendi irsâl olunup ol dahi mahmiye-i Kostantıniyye sûru ebvâbından Yenikapı hâricinde Merkez Efendi mahallesinde vâki‘ bundan akdem müteveffâ olan hamamcı İsa Çelebi Bey zevcesi Âişe bt. Mustafa menziline varıp zeyl-i kitâbda muharrerü’l-esâmî olan müslimîn mahzarlarında akd-i meclis-i şer‘ eyledikde bi’l-fi‘l Hâslar subaşısı emîni olan Murad Beşe b. Abdullah meclis-i mezbûrede mezbûre Âişe Hâtun muvâcehesinde bi tav‘ihî ikrâr ve i‘tirâf edip müteveffâ-yı mezbûr İsa Çelebi’nin metrûkâtının rub‘u zevce-i metrûkesi mezbûre Âişe Hâtun’a ve selâse erbâ‘ı beytülmâle âid olmağla da‘vâ ve taleb eylediğimde muhallefâtı şey’-i kalîl olmağın muslihûn tavassut edip müteveffâ-yı mezbûrun metrûkâtının selâse erbâ‘ı mukābelesinde bin akçe üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr bin akçeyi mezbûre Âişe Hâtun yedinden alıp kabz eyledim ba‘de’l-yevm müteveffâ-yı mezbûrun metrûkâtına müte‘allik min ba‘d da‘vâ ve talebim kalmadı dedikde mukırr-ı merkūm Murad Beşe’yi ikrâr-ı meşrûhunda el-mukarru lehâ’l-merkūm Âişe Hâtun vicâhen ve şifâhen tasdîk ve tahkīk edicek mâ hüve’l-vâki‘ gıbbe’t-taleb ketb olundu. Tahrîren fî evâili Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Yakub b. Kurd, Mustafa b. Mehmed, Cafer b. Abdullah, Ali ( ). [30a-1]