Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 180 Hüküm no: 190 Orijinal metin no: [30a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kamer Hatun’un vakfettiği evin Mehmed b. Abdullah’a tevcih edilmesi Medîne-i Hazret-i Ebî Eyyûb el-Ensârî mahallâtından Câmi‘-i Kebîr mahallesinde vâki‘ bir tarafı vakıf odalar ve bir tarafı tavukçu Mehmed Çelebi mülkü ve bir tarafı Yoğurtçuzâde Mustafa Çelebi ve taraf-ı râbi‘i Babazâde vakfı ile mahdûd bir bâb beyt-i süflî ve bir bâb beyt-i ulvîyi ve bi’r-i mâ ve cüneyne ve muhavvatayı müştemil olup merhûme Kamer Hâtun nâm sâhibetü’l-hayr vakf ve süknâsını beher yevm üç İhlâs-ı şerîf tilâvet edip meremmât-ı lâzımesin sâkin olan kimesne kendi malından etmek üzre sulehâya şart eylediği menzil ile’l-ân Hüsameddin Efendi nâm kadı’nın taht-ı tasarrufunda olup mezbûr Hüsameddin kendisi İstanbul’da sâkin olup süknâya muhtâc olmadığı ecilden menzil-i mezbûru ba‘zı kimesnelere îcâr eylediğinden gayrı hilâf-ı şart-ı vâkıfe bir kaç bin akçe alıp menzil-i mezbûru âhara fâriğ olmak murâdı olduğu mukarrer olmağın menzil-i mezkûr süknâya muhtâc olan bir ricâl-i sâliha cânib-i şer‘den tevcîh olunmak lâzım geldikde, menzil-i mezbûrun süknâsına tâlib olan işbu râfi‘ü’l-kitâb Mehmed b. Abdullah sulehâdan olup. süknâya eşedd-i ihtiyâcı olduğunu zeyl-i kitâbda mastûrü’l-esâmî olan müslimîn ihbâr etmeğin menzil-i mezbûr ber mûceb-i şart-ı vâkıfe mezbûr Mehmed’e tevcîh olunup işbu hurûf ber sebîl-i temessük ketb ve imlâ ve yed-i tâlibe vaz‘ ve i‘tâ olundu. Hurrire fî evâhiri Cumâdelâhire li sene seb‘a ve erba‘în ve elf. Şuhûdü’l-hâl: Ali Çelebi b. Mustafa, Derviş b. Mehmed, Mustafa b. Ahmed, Receb b. Ahmed, Resûl b. Rıdvan, Mustafa b. Ahmed ve gayruhüm.