Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 181 Hüküm no: 191 Orijinal metin no: [30a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi’nin evini Mehmed b. Veli’ye sattığı Medîne-i Hazret-i Ebî Eyyûb el-Ensârî mahallâtından Zeyneb Hâtun mahallesinde sâkin Mehmed Çelebi b. Filân mahfil-i kazâda hâfız-ı hâze’l-kitâb diğer Mehmed b. Veli nâm kimesne muvâcehesinde bi tav‘ihî ikrâr ve i‘tirâf edip mahalle-i mezbûrede vâki‘ akd-i âtî sudûruna değin silk-i mülk-i sahîhimde münselik olup bir tarafdan vakıf menzil ve bir tarafdan ayn-ı mâ’ ve tarafeynden tarîk-i âm ile mahdûd iki bâb tahtânî beyti ve bir bâb fevkānî şehnişînli beyti ve altında ahırı ve iki tahtapûşu ve fırını ve bi’r-i mâyı ve zât-ı eşcâr-ı müsmire ve gayr-ı müsmire bahçeyi müştemil mülk menzilimi, mezbûr Mehmed’e fıddî râyic fi’l-vakt on yedi bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ edip kabz-ı semen ve teslîm-i müsemmen eyledim ba‘de’l-yevm menzil-i mahdûd-ı mezbûr Mehmed’in mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde mukırr-ı merkūm Mehmed Çelebi’nin ikrâr-ı meşrûhunu el-mukarru lehü’l-merkūm Mehmed vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Hurrire fî evâili Cumâdelâhire târihihi’l-mezbûr. Şuhûdü’l-hâl: Es-Seyyid Abdülbâkī Çelebi b. ( ), Mustafa Dede b. Abdullah, üstâd Ahmed b. Receb, Ahmed b. Mehmed, Ömer b. Gülâbî, Ali Beşe b. Abdullah el-Muhzır, Mahmud b. Ahmed ve gayruhüm.