Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 181 Hüküm no: 192 Orijinal metin no: [30b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Çelebi b. Ali’nin evi ile Âişe Hatun’un vakfettiği ev arasındaki sınırın tesbiti Medîne-i Hazret-i Ebî Eyyûb el-Ensârî mahallâtından Zeyneb Hâtun mahallesi imâmı olan Mustafa Çelebi b. Ali meclis-i şer‘a gelip takrîr-i kelâm edip mahalle-i mezbûrede vâki‘ iki tarafı Mehmed Çelebi ve bir tarafı Mehmed b. Veli mülkü ve taraf-ı râbi‘den tarîk-i âm ile mahdûd bir bâb tahtânî beyti ve havluyu müştemil olup merkūme Âişe Hâtun nâm sâhibetü’l-hayr vakf ve hâsıl olan gallesini mahalle-i mezbûre imâmına şart eylediği vakıf menzilin beher şehr on akçe ücret-i müeccele ile müste’ciri olan mezbûr Mehmed Çelebi tarafında havlusu olmağla mülküne mahlût olup sınırı muhtel olmuşdur. Taraf-ı şer‘den üzerine varılıp vakf-ı mezbûrun sınırı ta‘yîn olunup alâmât-ı fâsıla vaz‘ olunmak matlûbumdur dedikde savb-ı şer‘-i kavîmden mevlânâ Mustafa Efendi irsâl olunup ol dahi zeyl-i kitâbda muharrerü’l-esâmî olan müslimîn ile menzil-i mevkūf-ı mezbûrun üzerine varıp mezbûr Mehmed Çelebi mahzarında akd-i meclis-i eylediklerinde menzil-i mevkūf-ı mezbûrun sınırı mezbûr Mehmed Çelebi’nin mülk menzilinde vâki‘ fevkānî odanın duvarı kurbundan doğru ayva ağacı mühâzîsinde tarîk-i âm tarafında olan tahta havluya varıp odasından mâ‘adâ havlusunun tûlen beş zirâ‘ arzen beş zirâ‘ arsası olduğu zeyl-i kitâbda mastûrü’l-esâmî olup vukūfu olan müslümanlar alâ tarîki’ş-şehâde ihbâr etmeğin vech-i meşrûh üzre mezbûr Mehmed Çelebi menzili ile vakıf menzil mâbeynine alâmât-ı fâsıla vaz‘ olunduğunu mevlânâ-yı mezbûr mahallinde tahrîr, ba‘dehû meclis-i şer‘de alâ vukū‘ihî ihbâr ve takrîr etmeğin mâ hüve’l-vâki‘ ketb olundu. Hurrire fî evâili Cumâdelâhire li sene seb‘a ve erba‘în ve elf. Şuhûdü’l-hâl: Es-Sâbikūn.