Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 214 Hüküm no: 203 Orijinal metin no: [27a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Şaban’ın izni olmadan evlendirilen küçük kızı Rabia’nın nikâhının geçersiz olduğu Mahmiye-i İstanbul’da Arpa Emîni mahallesi sâkinelerinden işbu bâ‘isetü’l-kitâb Âişe bt. Şaban nâm hâtun meclis-i şer‘de Ebûbekir b. Demir nâm kimesne mahzarında üzerine da‘vâ ve takrîr-i kelâm edip hâzır bi’l-meclis sadriye sagīre kızım Râbia bt. Mehmed’in benden gayrı velîsi yok iken mürebbîsi Ali b. Mehmed nâm kimesne târih-i kitâbdan on dört gün mukaddem benim iznimsiz bin akçe mehr-i müeccel ile mezbûr Ebûbekir’e inkâh ve tezevvüc etmekle akd-i mezbûr sahîh değil iken mezbûr Ebûbekir sagīre-i mezbûre için zevce-i menkûhamdır deyû mu‘ârazadan hâlî değildir, suâl olunup men‘ olunmak matlûbumdur dedikde, gıbbe’s-suâl mezbûr Ebûbekir cevâbında müdde‘iyye-i mezbûre sagīre-i mezbûreyi mehr-i mezbûr ile bana tezvîce mezbûr Ali’yi vekîl edip mezbûr Ali dahi ba‘de kabûli’l-vekâle bana vekâleten mehr-i mezbûr ile tezvîc ve inkâh edip ben dahi tezevvüc etmişidim deyû def‘le mukābele edicek gıbbe’l-istintâk ve’l-inkâr mezbûr Ebûbekir’den sıdk-ı makāline mutâbık mübeyyine beyyine taleb olundukda ityân-ı beyyineden izhâr-ı acz edip istihlâf etmeğin müdde‘iyye-i mezbûre Âişe’ye on dört gün mukaddem sagīre-i mezbûreyi mezbûr Ebûbekir’e bin akçe mehr-i müeccel ile tezvîc ve inkâha mezbûr Ali’yi vekîl etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince mezbûr Ebûbekir bilâ-beyyine vech-i mübeyyen üzre mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Cemâziyelevvel li sene seb‘a ve seb‘în ve elf. Şuhûdü’l-hâl: Mehmed b. Ali, Mustafa Beşe b. Hasan, Mehmed b. Ramazan, Şükrullah Bey b. Mustafa.