Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 182 Hüküm no: 193 Orijinal metin no: [30b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Mehmed’in çiftlik ve değirmenin borçlarına karşılık Muslihiddin Ağa b. Hüseyin’e satıldığı Dârü’s-saltanati’s-seniyye Kostantıniyye el-mahmiyye -sânehallâhu te‘âlâ ani’l-fiten ve’l-beliyye- de Kırkçeşme kurbunda Hüsam Bey mahallesi sâkinelerinden iken bundan akdem fevt olan Fâtıma Hâtun bt. Mehmed Ağa nâm müteveffânın zevci Mehmed Efendi b. Budak ve li ebeveyn kız karındaşı Âişe nâm sagīreye kıbel-i şer‘den mansûbe vasiyy-i şer‘îsi olan vâlidesi ve vârisesi Safiye bt. Abdullah nâm hâtun tarafından bey‘-i âti’z-zikri ikrâra vekîl olup mezbûre Safiye Hâtun’u ma‘rifet-i şer‘iyye ile ârifeyn olan Ahmed Efendi b. Hüseyin el-kādî ve Hüseyin Çelebi b. Ahmed şehâdetleri ile vekâleti sâbite olan Hüseyin Efendi b. Kalender el-kādî mahfil-i kazâda işbu kitâb-ı sedâd-intisâbın hâfız-ı umdetü’l-emâcid ve’l-ekârim sâbıkan sekbanbaşı olan Muslihiddin Ağa b. Hüseyin taraf-ı karînü’ş-şereflerinden ikrârı- âti’z-zikri tasdîka vekîl olup vekâleti Şaban Efendi b. el-Hâc Mehmed el-İmâm ve el-Hâc Sinan b. Abdullah şehâdetleri ile sâbite olan Mehmed Bey b. Abdullah muvâcehesinde mezbûr Mehmed Efendi asâleten ve merkūm Hüseyin Efendi vekâleten ikrâr ve i‘tirâf edip müteveffât-ı mezbûrenin metrûkâtından olup Havâss-ı Aliyye kazâsı müzâfâtından Terkos nâhiyesine tâbi‘ Karaca Belgrad nâm karyede vâki‘ iki tarafdan tarîk-i âm ve iki tarafdan orman ile mahdûd üç bâb beyt-i süflîyi ve bir sofayı ve iki kileri ve bi’r-i mâyı ve çatma anbarı ve dehlizi ve üç ahırı ve bir samanlığı ve bir bâb tahtânî odayı ve mâ-i cârîyi ve bir kıt‘a bağı ve zât-ı eşcâr-ı müsmire olan bahçeyi müştemil çiftlik ta‘bîr olunur mülk menzili, cümle tevâbi‘ ve levâhıkı ile ve menzil-i mezbûr içinde vâki‘ beş re’s su sığırı öküzünü ve iki re’s kara sığır öküzünü ve on dört re’s su sığırı ineğini ve otuz re’s kara sığır ineğini ve yedi re’s kara sığır düğesini ve sekiz re’s su sığırı buzağısını ve on sekiz re’s kara sığır buzağısını ve üç yüz yirmi keyl hıntayı ve iki yüz kırk keyl şa‘îri ve yüz yirmi beş keyl alefi ve bir güğümü ve iki baltayı ve dört arabayı ve sâir âlât-ı zirâ‘at ve esbâb-ı hırâseti ve karye-i merkūme kurbunda Belgrad suyu demekle ma‘rûf nehir üzerinde vâki‘ mâ-i mezbûr ile dâyir bir göz değirmeni müteveffâ-yı mezbûrenin zarûret-i düyûn-ı müsbetesi için müşârün-ileyh Muslihiddin Ağa hazretlerine fıddî nakd-i râyic fi’l-vakt yüz elli bin akçeye bey‘-i bâtt-ı sahîh-i şer‘î ve safka-i vâhide ile bey‘ edip kabz-ı semen ve teslîm-i müsemmen eyledik. Ba‘de’l-yevm zikr olunan çiftlik cümle tevâbi‘ ve levâhıkı ile ve mârrü’z-zikr değirmen müvekkil-i müşârün-ileyh Muslihiddin [31a] Ağa hazretlerinin mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde mukırrân-ı merkūmân Mehmed Efendi ve Hüseyin Efendi’nin bi’l-asâle ve bi’l-vekâle cârî olan ikrârını vekîl-i merkūm Mehmed Bey bi’l-vekâle vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Hurrire fî gurreti Recebi’l-mürecceb li sene seb‘a ve erba‘în ve elf. Şuhûdü’l-hâl: Ramazan Efendi b. ( ) el-Müderris, İsa Efendi b. ( ) el-Müderris, el-Hâc Ali b. Abdullah, Ali Beşe b. Mustafa el-Yesârî, el-Hâc Lütfi b. Davud, Rıdvan b. Abdullah, er-Râcil, Mustafa b. Veli, Cafer b. Abdullah, Mahmud b. Ahmed ve gayruhüm.