Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 183 Hüküm no: 194 Orijinal metin no: [31a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Sinan Bey b. Abdullah’ın çiftlik, tarla ve çayırlarını Muslihiddin Ağa b. Hüseyin’e sattığı Dârü’s-saltanati’s-seniyye Kostantıniyye el-mahmiyye mahallâtından Oruc Gāzi mahallesinde sâkin el-Hâc Sinan Bey b. Abdullah mahfil-i kazâda sâbıkan sekbanbaşı olan umdetü’l-emâcid ve’l-ekârim Muslihiddin Ağa b. Hüseyin tarafından ikrâr-ı âti’z-zikri tasdîka vekîl olup vekâleti Sinan Efendi b. el-Hâc Mehmed el-İmâm ve Mehmed Efendi b. Budak şehâdetleri ile şer‘an sâbite olan Mehmed Bey b. Abdullah mahzarında bi tav‘ihî ikrâr ve i‘tirâf edip târih-i kitâbdan dört sene mukaddem silk-i mülkünde münselik olup Havâss-ı Refî‘a kazâsı müzâfâtından Çekmece-i Sagīr nâhiyesine tâbi‘ İstarto nâm karyede vâki‘ bir tarafdan Rum Hüseyin nâm kimesne çiftliği, Hatice bt. Mehmed Ağa nâm hâtun ve bir tarafdan Mehmed b. Rüstem nâm râcil çiftliği ve taraf-ı râbi‘den tarîk-i âm ile mahdûd altı bâb fevkānî odayı ve altında ahırı ve bir çatma anbarı ve zât-ı eşcâr olan bahçeyi müştemil çiftlik ta‘bîr olunur mülk menzilimi ve menzil-i mezbûr içinde vâki‘ iki çift su sığırı öküzünü ve üç çift kara sığır öküzü ve sekiz re’s su sığırı ineğini ve buzağısını ve yedi re’s kara sığır ineğini ve buzağısını ve beş arabayı ve sâir âlât-ı zirâ‘at ve eşyâ-i hırâseti ve Keyvan ve Ferhad nâm abd-i memlûklerimi ve Nâzenin nâm câriye-i memlûkemi ve yine karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd iki kıt‘a mülk bağımı ve Dere nâm karyede vâki‘ Medîne-i Münevvere evkāf-ı şerîfesine senevî üç yüz altmış akçe olan mukāta‘ası sakf-ı vâhid altında iki göz değirmeni ve kurbunda iki kıt‘a mülk lahana bostanımı müşârün-ileyh Muslihiddin Ağa hazretlerine fıddî nakd-i râyic fi’l-vakt yüz elli bin akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledikden sonra yine karye-i mezbûrede vâki‘ zikr olunan çiftlik ile mutasarrıf olduğum merhûm Sultan Bayezid Hân evkāf-ı şerîflerinden olan lede’l-ahâlî ve’l-cîrân ma‘lûmü’l-hudûd üç kıt‘a çayırın ve tahmînen altmış müd tohum istî‘âb eder on beş kıt‘a tarlanın dahi hakk-ı tasarrufunu, mezbûrü’n-na‘t elli bin akçe bedel-i tefvîz ve evkāf-ı mezbûre mütevellîsi ma‘rifetiyle tefvîz ve teslîm ve bedel-i tefvîz olan meblağ-ı mezkûr elli bin akçeyi yedinden kabz ve tesellüm eylemiş idim ilâ hâze’l-ân zikr olunan emlâk müşârün-ileyh Muslihiddin Ağa’nın mülk-i müşterâsı ve sâlifü’z-zikr çayırlar ve tarlalar dâhil-i taht-ı tasarrufudur dedikde mukırr-ı merkūm el-Hâc Sinan Bey’in minvâl-i meşrûh üzre cârî ve sâdır olan ikrârını vekîl-i merkūm Mehmed Bey bi’l-vekâle vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Târihuhü’l-mezbûr. Şuhûdü’l-hâl: Es-Sâbikūn.