Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 184 Hüküm no: 195 Orijinal metin no: [31a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Mehmed Ağa’nın tarla ve çayırlarının Muslihiddin Ağa b. Hüseyin’e devredilmesi Dârü’s-saltanati’s-seniyye Kostantıniyye el-mahmiyye -sânehallâhu te‘âlâ ani’l-âfât ve’l-beliyye- de Kırkçeşme kurbunda Hüsam Bey mahallesinde sâkin fahrü’l-akrân Mehmed Efendi b. Budak [mahfil-i] kazâda sâhibü hâze’l-kitâb sâbıkan sekbanbaşı olan umdetü’l-emâcid ve’l-ekârim câmi‘ü’l-mehâmid ve’l-mekârim Muslihiddin Ağa b. Hüseyin taraf-ı karînü’ş-şereflerinden ikrâr-ı âti’z-zikri tasdîka ve tevkîl olup vekâleti Şaban Efendi b. el-Hâc Mehmed el-İmâm ve el-Hâc Sinan b. Abdullah şehâdetleri ile sâbite olan Mehmed Bey b. Abdullah muvâcehesinde bi tav‘ihî ikrâr ve i‘tirâf edip Havâss-ı Refî‘a kazâsı müzâfâtından Terkos nâhiyesine tâbi‘ Karaca Belgrad nâm karyede vâki‘ bundan akdem fevt olan zevcem Fâtıma Hâtun bt. Mehmed Ağa nâm müteveffânın metrûkâtından [31b] zarûret-i deyn-i müsbete için bey‘ olunan çiftlik ile tasarruf olunur merkūm ve mağfûrun-leh Sultan Bayezid Hân -aleyhi’r-rahmetü ve’l-gufrân- evkāf-ı şerîfelerinden olup zikr olunan çiftliğe intimâ ile tahdîd ve tavsîfden müstağnî olan tahmînen iki yüz araba otluk hâsıl olur on kıt‘a çayırları ve tahmînen dört yüz yirmi keyl tohum istî‘âb eder otuz kıt‘a tarlaları, müteveffât-ı mezbûre mahlûlünden evkāf-ı mezbûre mütevellîsinden resm-i tapu ile tefevvuz eylemişidim el-hâletü hâzihî müvekkil-i müşârün-ileyh Muslihiddin Ağa hazretlerine nakd-i râyic fi’l-vakt elli bin akçe bedel-i tefvîz [ile] evkāf-ı mezbûre mütevellîsi ma‘rifetiyle zikr olunan çayırlar ve tarlalar hakk-ı tasarrufunu tefvîz eyledim ba‘de’l-yevm zikr olunan çayırlar ve tarlalar dâhil-i taht-ı tasarrufu olmuşdur, keyfe mâ yeşâ’ ve hasbe mâ yahtâr mutasarrıf ola dedikde mukırr-ı merkūm Mehmed Efendi’nin ikrâr-ı meşrûhunu vekîl-i merkūm Mehmed Bey bi’l-vekâle vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Hurrire fî gurreti Recebi’l-mürecceb li sene seb‘a ve erba‘în ve elf. Şuhûdü’l-hâl: Zahrü’l-kuzât Hüseyin Efendi b. Kalender, fahrü’l-kuzât Ahmed Efendi b. Hüseyin, el-Hâc Ali b. Abdullah, el-Hâc Nasuh b. Davud, Ramazan Efendi el-Müderris, İsa Efendi el-Müderris, Rıdvan [b.] Abdullah er-Râcil, Mahmud b. Hasan.