Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 185 Hüküm no: 196 Orijinal metin no: [31b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Göka v. Garden’in tarla, bağ ve eşyalara ait kendi hissesini oğlu mühtedi Hasan’a sattığı Vilâyet-i Rumeli’nde İstarova kazâsı müzâfâtından Bakri nâhiyesine tâbi‘ Büyük Hacme nâm karye sâkinlerinden Göka v. Garden nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb oğlu Hasan nâm mühtedî muvâcehesinde bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Hüsrev mülkü ve bir tarafdan Kika v. Tanaşi mülkü ve bir tarafdan Niko v. Kirici mülkü ve bir tarafdan tarîk-i âm ile mahdûd iki bâb tahtânî beyti ve bir samanlığı ve harman yerini müştemil mülk menzilden ve beynimizde ma‘lûm esâs ve evânî-i nühâsdan ve karye-i mezbûre sınırında vâki‘ sumak eşcârını müştemil iki kıt‘a bahçeden ve lede’l-ahâlî ve’l-cîrân ma‘lûmü’l-hudûd altı kıt‘a mülk bağdan ve yine karye-i mezbûrede vâki‘ lede’l-ahâlî ma‘lûmü’l-hudûd üç kıt‘a mülk bostan yerinden ve yine karye-i mezbûre kurbunda Oskombi nâm nehir üzerinde dâyir köprü kurbunda bir göz un değirmeninden ve yine karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd iki kıt‘a mülk bahçeden ve dört re’s kara sığır öküzü ve kırk re’s ganem ve iki re’s bârgir ve dört fıçı ve bir şırahâne ve sâir âlât-ı zirâ‘at ve eşyâ-i hırâsetimden rub‘-ı şâyi‘ini mezbûr Hasan’a fıddî nakd-i râyic fi’l-vakt üç bin akçeye tarafeynden îcâb ve kabûlü hâvî bey‘-i bâtt-ı sahîh ve safka-i vâhide ile bey‘ edip ol dahi vech-i meşrûh üzre iştirâ ve kabûl eyledikden sonra yine karye-i mezbûre hudûdu dâhilinde vâki‘ lede’l-ahâlî ve’l-cîrân ma‘lûmü’l-hudûd taht-ı tasarrufumda olan yirmi kıt‘a tarlaların dahi rub‘-ı şâyi‘ini, sâhib-i arz ma‘rifetiyle bin akçe mukābelesinde mezbûr Hasan’a tefvîz edip ol dahi vech-i meşrûh üzre tefevvuz ve kabûl eyledikden sonra semen-i mezbûr üç bin akçe ile bedel-i tefvîz olan bin akçe ki cem‘an dört bin akçeyi mezbûr Hasan yedinden tamâmen alıp kabz edip mebî‘-i mezbûru mahallinde kabz ve tarlaları zabt ve tasarrufa mezbûr Hasan’ı taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fî selhi Cumâdelâhire li sene seb‘a ve erba‘în ve elf. Şuhûdü’l-hâl: Mustafa Beşe b. Mehmed, Ali Beşe b. Ahmed, Hüsrev b. Abdullah, Ali b. Kurd, Hasan b. Mehmed, Mehmed Beşe b. ( ), Mustafa b. Veli.