Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 186 Hüküm no: 198 Orijinal metin no: [31b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hemo v. Yani’nin ev ve tarlasını Hasan b. Ahmed’e sattığı Vilâyet-i Rumeli’nde Arnavud Belgradı kazâsına tâbi‘ Moloşte nâm karye sâkinlerinden Hemo v. Yani nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Hasan b. Ahmed nâm kimesne mahzarında bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Kuyucu Mehmed Bey mülkü ve bir tarafdan Minho v. Moço mülkü ve bir tarafdan Kolo v. Duka mülkü ve bir tarafdan Papa Zoyo mülkü ile mahdûd ve mümtâz bir bâb tahtânî beyti ve bir çatma anbarı ve dört fıçıyı ve zât-ı eşcâr-ı müsmire ve gayr-ı [32a] müsmire cüneyneyi ve harman yerini müştemil mülk menzilimi, cümle-i tâbi‘ ve levâhıkı ile mezbûr Hasan’a fıddî nakd-i râyic fi’l-vakt üç bin yedi yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ edip ol dahi vech-i meşrûh üzre iştirâ ve kabûl eyledikden sonra yine karye-i mezbûr hudûdu dâhilinde vâki‘ lede’l-ahâlî ve’l-cîrân ma‘lûmü’l-hudûd taht-ı tasarrufumda olan tahmînen üç keyl tohum istî‘âb eder iki kıt‘a tarlalarımın dahi hakk-ı tasarrufunu, sâhib-i arz ma‘rifetiyle mezbûr Hasan’a iki yüz akçe mukābelesinde tefvîz edip ol dahi vech-i meşrûh üzre tefevvuz ve kabûl eyledikden sonra semen-i mezbûr üç bin yedi yüz akçe ile bedel-i tefvîz olan iki yüz akçe ki cem‘an üç bin dokuz [yüz] akçeyi mezbûr Hasan yedinden tamâmen ahz ve kabz edip bey‘-i mezbûru mahallinde ahz ve kabza ve tarlaları zabta ve tasarrufa mezbûr Hasan’ı taslît eyledim dedikde gıbbe’t-tasdîki’ş-şer‘î mâ vaka‘a gıbbe’t-taleb ketb olundu. Tahrîren fi’l-yevmi’s-sânî min Recebi’l-ferd li sene seb‘a ve erba‘în ve elf. Şuhûdü’l-hâl: Ali b. Hüseyin, Hüseyin b. Abdullah, Osman b. Abdullah, Hasan b. Abdullah, Hasan b. İbrahim, Hristo v. Kolo, Dimo v. Yani, Yani v. Piyo, Manol v. Minho, Yani v. Kolo ve gayruhüm mine’l-hâzırûn.