Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 187 Hüküm no: 199 Orijinal metin no: [32a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Semo’nun varislerinin sulh olduğu Vilâyet-i Rumeli’nde Yenişehir kazâsı müzâfâtından Kûhistan nâhiyesine tâbi‘ Büyük Kerasova nâm karye sâkinlerinden iken bundan akdem hâlik olan Dimitri v. Simo nâm zimmînin verâseti sulbiye kızı Agora’ya ve li ebeveyn karındaşı Todori’ye münhasıra olduğu şer‘an mütehakkik oldukdan sonra mezbûre Agora tarafından sulh-i âti’z-zikre vekîl olup vekâleti mezbûre Agora’yı ma‘rifet-i şer‘iyye ile ârifeyn olan Nikola v. Todori ve İsviraki v. Aglamo nâm zimmîler şehâdetleri ile sâbite olan deferci? Panayot v. Todori nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr mezbûr Dimitri muvâcehesinde bi’l-vekâle ikrâr-ı tâm ve takrîr-i kelâm edip müvekkilem ve zevcem mezbûre Agora’ya babası hâlik-i mezbûrun muhallefâtından isâbet eden nısf hisse-i şer‘iyyesin mezbûr Dimitri’den taleb eyledikde mâbeynimizde münâza‘ât-ı kesîre ve muhâsamât-ı adîde vâkı‘a olmuşidi el-hâletü hâzihî es-sulhu seyyidü’l-ahkâm muktezâsınca muslihûn tavassut edip mâbeynimizi beş bin beş yüz akçeye sulh eylediklerinde ben dahi vekâlet-i mahkiyem hasebiyle sulh-i mezbûru kabûl ve bedel-i sulh olan meblağ-ı mezbûr beş bin beş yüz akçeyi mezbûr Dimitri yedinden tamâmen alıp kabz edip husûs-ı mezbûra müte‘allik da‘vâdan mezbûr Dimitri’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm husûs-ı mezbûra müte‘allik benden bi’l-vekâle ve mezbûre Agora’dan bi’l-asâle da‘vâ ve nizâ‘ sudûr ve zuhûr eder ise lede’l-hükkâm mesmû‘a ve makbûle olmasın dedikde gıbbe’t-tasdîki’ş-şer‘î mâ vaka‘a gıbbe’t-taleb ketb olundu. Tahrîren fi’l-yevmi’s-sânî min Recebi’l-mürecceb li sene seb‘a ve erba‘în ve elf. Şuhûdü’l-hâl: Mustafa b. Veli, Mehmed b. Ahmed, Cafer b. Abdullah, İsteryano v. Dimitri, Yani v. Yorgi, Dimitri v. İsteryano, Dimo [v.] Mestaki, Papa Todori [v.] Maslik.