Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 188 Hüküm no: 201 Orijinal metin no: [32a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muharrem Beşe b. Süleyman’ın evini Ahmed Bey’e sattığı Sâbıkan vilâyet-i Rumeli’nde cezîre-i Mora’da kasaba-i Trapoliçe mahallâtından Şeyh mahallesi sâkinlerinden olup hâlâ mahmiye-i Kostantıniyye’de merhûm ve mağfûrun-leh Sultan Süleyman câmi‘-i şerîfi kurbunda Kâtib Şemseddin mahallesinde sâkin olan Muharrem Beşe b. Süleyman nâm râcil meclis-i şer‘-i hatîr-i lâzımü’t-tevkīrde işbu hâmilü’l-kitâb Ahmed Bey b. İbrahim mahzarında ikrâr ve i‘tirâf edip kasaba-i mezbûrede Şeyh mahallesinde vâki‘ bir tarafdan Hasan Beşe mülkü ve bir tarafdan Emrullah Çelebi mülkü ve bir tarafdan Kakoyani nâm zimmî mülkü ve bir tarafdan tarîk-i âm ile mahdûd olup bu akdin sudûruna değin silk-i mülk-i sahîhimde münselik olan emlâkimden [32b] bir bâb fevkānî ve bir bâb tahtânî iki beyti ve bir kileri ve bir çatma anbarı ve zât-ı eşcâr-ı müsmire muhavvatayı müştemil mülk menzilimi, cümle tevâbi‘ ve levâhıkı ile mezbûr Ahmed Bey’e fıddî nakd-i râyic fi’l-vakt üç bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ve kabûl eyledikden sonra mezbûr üç bin akçeyi mezbûr Ahmed Bey yedinden bi’t-tamâm ve’l-kemâl ahz ve kabz edip mebî‘-i mezbûru mahallinde zabt ve tasarrufa mezbûr Ahmed Bey’i taslît eyledim ba‘de’l-yevm zikr olunan menzil-i mezbûr Ahmed Bey’in mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde mukırr-ı mezbûr Muharrem Beşe’yi ikrâr-ı meşrûhunda el-mukarru lehü’l-merkūm Ahmed Bey vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Tahrîren fi’l-yevmi’s-sâlis min Recebi’l-ferd li sene seb‘a ve erba‘în ve elf. Şuhûdü’l-hâl: Hüdâverdi Dede b. Hüseyin, Yahya Efendi b. Hüseyin Ağa, Mehmed b. İbrahim, Eyüb Çelebi b. Hüdâverdi, Ahmed Çelebi b. Mahmud, Ahmed b. Receb.