Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 189 Hüküm no: 202 Orijinal metin no: [32b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Anastaş v. Yorgi’nin alacak davasının reddi Vilâyet-i Rumeli’nde Yenişehir kazâsı müzâfâtından Kûhistan nâhiyesine tâbi‘ Büyük Kerasova nâm karye[de] mürd olup hâlâ mahmiye-i İstanbul’da Küçük Karaman’da bakkal olan Anastaş v. Yorgi nâm zimmî mahfil-i kazâda yine karye-i mezbûre sâkinlerinden Todori v. Minho nâm zimmîyi ihzâr ve mahzarında üzerine takrîr-i da‘vâ edip târih-i kitâbdan sekiz sene mukaddem bin otuz dokuz senesinde karye-i mezbûre ahâlîsi üzerlerine edâsı lâzım gelen cizye ve ispençe ve bedel-i avârız ve sâir tekâlîf-i şâkkaları tahsîl edip cem‘a memûr olanlara edâya beni vekîl eylemişidi sene-i mezbûrede zikr olunan tekâlîfden mezbûr Todori zimmetine lâzım gelen üç bin beş yüz akçeyi ben malımdan cem‘a memûr olanlara edâ ve teslîm eyledim hâlâ meblağ-ı mezbûru taleb ederim suâl olunup alıverilmek matlûbumdur dedikde gıbbe’s-suâl mezbûr Todori cevâbında, sene-i mezbûrede zikr olunan tekâlîfden üzerime lâzım gelen meblağ-ı mezbûr üç bin beş yüz akçeyi sene-i mezbûrede mezbûr Anastaş’a bi’t-tamâm ve’l-kemâl edâ ve teslîm eyledim deyicek Anastaş münkir olmağla mezbûr Todori’nin cevâbına mutâbık beyyine taleb olundukda yine karye-i mezbûre sâkinlerinden Dimitri v. Yorgi ve Yorgi v. Virane nâm zimmîler li ecli’ş-şehâdet-i şer‘iyye edip fi’l-vâki‘ sene-i mezbûrede zikr olunan tekâlîfden mezbûr Todori zimmetine edâsı lâzım gelen üç bin beş yüz akçeyi sene-i mezbûrede bi’t-tamâm ve’l-kemâl mezbûr Anastaş’a edâ ve teslîm etmişidi biz bu husûsa şâhidleriz şehâdet dahi ederiz dediklerinde gıbbe ri‘âyeti şerâiti’l-kabûl şehâdetleri makbûle olmağın mezbûr Anastaş ol vechile men‘ birle mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Yakub b. Kurd, Mustafa b. Veli, Cafer b. Abdullah, Mahmud b. Ahmed, Anastaş v. Yorgi, Nikola [v.] Todori, İsterno v. Ramanet, Panayot [v.] Todori ve gayruhüm.