Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 190 Hüküm no: 204 Orijinal metin no: [33a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tanaşi v. Yorgi’nin tarla ve değirmenini Hristo v. Torso’ya sattığı Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ Vonişte nâm karye sâkinlerinden Tanaşi v. Yorgi nâm zimmî mahfil-i kazâda işbu hâmilü’s-sifr Hristo v. Torso nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûre kurbunda Şarlıderesi demekle ma‘rûf nehir üzerinde dâyir Hristo nâm zimmînin değirmeni altında bir göz mülk harâba müşrif olan değirmenimi mezbûr Hristo’ya fıddî nakd-i râyic fi’l-vakt iki bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra yine zikr olunan değirmen kurbunda bir tarafdan Hristo değirmeni ve bir tarafdan dere ve bir tarafdan arz-ı hâliye ve bir tarafdan İstafori tarlası ile mahdûd tahmînen iki keyl tohum istî‘âb eder bir kıt‘a tarlamın dahi hakk-ı tasarrufunu sâhib-i arz ma‘rifetiyle mezbûr Hristo’ya altı yüz akçe mukābelesinde tefvîz edip ol dahi tefevvuz ve kabûl eyledikden sonra semen-i mezbûr iki bin akçe ile bedel-i tefvîz olan altı yüz akçe ki cem‘an iki bin altı yüz akçeyi mezbûr Hristo yedinden tamâmen alıp kabz edip mebî‘-i mezbûru mahallinde zabt ve tasarrufa mezbûr Hristo’yu taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’r-râbi‘ min Recebi’l-ferd târihi’l-mezbûr. Şuhûdü’l-hâl: Yakub b. Kurd, Mustafa Beşe b. Mahmud, Mustafa b. Veli, Cafer b. Abdullah, Dimo v. Vasil, Panayot v. Mihal, Diyoko v. Mariko, İsteryano v. Angilaki.