Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 192 Hüküm no: 207 Orijinal metin no: [33b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha Hatun bt. Şeyh Hızır Efendi’nin istiğlâl yoluyla evini Hüseyin Ağa Vakfı’na sattığı Medîne-i Hazret-i Ebî Eyyûb el-Ensârî mahallâtından Baba Haydar mahallesinde sâkine olan Sâliha Hâtun bt. Şeyh Hızır Efendi nâm zevcesi kıbelinden âtiyyü’z-zikr bey‘ ve istîcâr ikrârına vekâleti, mezbûreyi ma‘rifet-i şer‘iyye ile tanıyan Ahmed Çelebi b. Mehmed ve Receb b. Abdullah’ın şehâdetleri ile sâbit olan Mesud Çavuş b. Abdullah nâm kimesne meclis-i şer‘-i şerîfde hâzır olup müvekkile-i mezbûresinin, âtiyyü’z-zikr menzilini, hâl-i hayâtında Galatasaray Ağası deyû bilinen merhûm Hüseyin Ağa vakfı’na mütevellî olan hâmil-i hâze’l-kitâb bevvâb-ı sultânî Hasan Ağa b. Abdullah’a bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl maksadıyla, mezbûre Sâliha Hâtun’un işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i merkūmede kâin bulunan bir tarafdan Şeyh Mehmed Efendi mülkü, diğer tarafdan merhûm Ali Paşa vakfı, öteki tarafdan Kuyucubaşı mülkü ve diğer tarafdan da tarîk-i âm ile mahdûd cemî‘-i menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt, bir guruş yüz yirmi akçe hesâbı üzre yüz yirmi riyâlî guruş semen-i mu‘ayyen-i makbûzla iştirâ etti. Bâyi‘a-i mezbûrenin menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr ayın gurresinden üç sene tamâmına dört bin üç yüz akçe ücret ile menzil-i mezbûru kirâya verdi. Mütevellî-i mezbûr, vâki‘ ikrârı vicâhen ve şifâhen tasdîk etti. Sonra Ahmed Çelebi b. Mehmed ve mezbûr Mesud Çavuş’un her biri menzil-i mezbûrun derkine ve ücret-i mesfûreye îcâb ve kabûlü hâvî kefâletle kefîl oldu. Cerâ zâlike ve hurrire fî evâili Cumâdelâhire sene seb‘a ve erba‘în ve elf. Şuhûdü’l-hâl: Müderris Vanî Ehad? b. Müderris Abdurrahman Efendi, Mustafa Efendi b. (…), Mehmed b. Receb, Mehmed b. Ali, el-Hâc Mustafa, Receb Bey b. Abdullah, Ali b. Hasan