Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 192 Hüküm no: 208 Orijinal metin no: [33b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın bağ ev tarla ve eşyalarını Mustafa b. Hüseyin’e sattığı Vilâyet-i Rumeli’nde Opar kazâsına tâbi‘ Düşe[h]ri nâm karye sâkinlerinden Mehmed Beşe b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Mustafa b. Hüseyin nâm kimesne mahzarında bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Mustafa Beşe b. Aydın mülkü ve bir tarafdan Göka v. Andriye ve bir tarafdan Petri v. Nikola mülkü ve bir tarafdan tarîk-i âm ile mahdûd iki bâb fevkānî beyti ve bir samanlık ve bir çatma anbarı ve karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd üç kıt‘a mülk bağ ve bir kıt‘a mülk bostandan ve beynimizde ma‘lûm iki re’s bârgir ve iki re’s kara sığır öküzü ve iki re’s kara sığır ineği ve altmış re’s ganemden sülüs-i şâyi‘ini mezbûr Mustafa’ya fıddî nakd-i râyic fi’l-vakt sekiz bin akçeye bey‘-i bâtt-ı sahîh-i şer‘î ve safka-i vâhide ile bey‘ edip ol dahi vech-i meşrûh üzre iştirâ ve kabûl eyledikden sonra yine karye-i mezbûre sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd on kıt‘a tarlalarımın dahi sülüs-i şâyi‘inin hakk-ı tasarrufunu sâhib-i arz ma‘rifetiyle iki bin akçe mukābelesinde mezbûr Mustafa’ya tefvîz edip ol dahi vech-i meşrûh üzre tefevvuz ve kabûl eyledikden sonra semen-i mezbûr sekiz bin akçe ile bedel-i tefvîz olan iki bin akçe ki cem‘an on bin akçeyi mezbûr Mustafa yedinden tamâmen alıp kabz edip eşyâ-i merkūmeyi mahallinde zabt ve kabza ve tarlaları tasarrufa mezbûr Mustafa’yı taslît eyledim dedikde gıbbe’t-tasdîk mâ vaka‘a bi’t-taleb kayd olundu. Tahrîren fi’l-yevmi’l-hâmis min Recebi’l-ferd li sene seb‘a ve erba‘în ve elf. Şuhûdü’l-hâl: İbrahim Beşe b. Ahmed, Mustafa b. Aydın, Kasım b. Aydın, Hüseyin b. İbrahim, Mehmed b. Kasım, Ali b. Hamza.