Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 193 Hüküm no: 210 Orijinal metin no: [34a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman b. Kayser’in mirasının varisleri arasında paylaşıldığı Medîne-i Hazret-i Ebî Eyyûb el-Ensârî mahallâtından Şeyh Ahmed mahallesinde sâkin iken bundan akdem vefât eden merhûm Osman b. Kayser’in verâseti zevce-i metrûkesi ve vârisesi İsmihan bt. Abdullah ile sulbî sagīr oğulları Mehmed ve Hüseyin’e münhasıra olup kable’l-kısme mezbûr Mehmed dahi vefât edip verâseti vâlidesi mezbûre İsmihan ile li ebeveyn karındaşı merkūm Hüseyin’e münhasır olup kable’l-kısme merkūm Hüseyin dahi vefât edip kezâlik verâseti vâlidesi mezbûre İsmihan ile li ebeveyn ammileri İsmail ve Hasan’a münhasıra olduğu İsmail b. Ahmed [ve] Ebûbekir b. Ahmed nâm kimesne şehâdetleri ile şer‘an müte‘ayyin ve mütebeyyin oldukdan sonra merkūm İsmail kendi cânibinden asâleten ve karındaşı merkūm Hasan tarafından dahi şâhideyn-i mezbûreyn şehâdetleri ile vekâleti sâbite olmağın vekâleten mahfil-i kazâda işbu bâ‘isetü’l-kitâb mezbûre İsmihan mahzarında ikrâr ve i‘tirâf edip mûrisimiz müteveffâ-yı mezbûr Osman’dan bi hükmi’l-münâsaha bana ve müvekkilim karındaşım mezbûr Hasan’a şer‘an intikāl eden beş yüz nakd-i râyic fi’l-vakt fıddî akçe hisse-i şer‘iyyemizi müteveffâ-yı mezbûrun muhallefâtına vâzı‘atü’l-yed olan mezbûre İsmihan yedinden bi’t-tamâm ve’l-kemâl ahz ve kabz eyledim müteveffâ-yı mezbûrun muhallefâtına müte‘allik mezbûre İsmihan ile benim ve karındaşım müvekkilim mezbûr Hasan’ın da‘vâ ve nizâ‘ımız kalmadı mûrisimiz mezbûr Osman’ın muhallefâtına müte‘allik da‘vâdan zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm benden ve müvekkilim mezbûr Hasan’dan asâleten ve vekâleten husûs-ı mezbûra müte‘allik da‘vâ sudûr ederse lede’l-hükkâmi’l-kirâm mesmû‘a olmasın dedikde mukırr-ı mezbûr İsmail’in bi’l-asâle ve bi’l-vekâle cârî olan ikrârını mezbûre İsmihan vicâhen tasdîk etmeğin mâ vaka‘a bi’t-taleb ketb olundu. Fi’l-yevmi’l-hâdî aşer min Cumâdelâhire li sene seb‘a ve erba‘în ve elf. Şuhûdü’l-hâl: El-Hâc Hızır b. Mahmud, Hüdâverdi ( ) er-Râcil, Arslan b. Türk, Mustafa b. Yakub, Mustafa b. Veli ve gayruhüm.