Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 194 Hüküm no: 211 Orijinal metin no: [34a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ziro v. Todori’nin bağını Todori v. İsteryano’ya sattığı Vilâyet-i Rumeli’nde Yenişehir kazâsı müzâfâtından Kûhistan nâhiyesine tâbi‘ Büyük Kerasova nâm karye sâkinlerinden Ziro v. Todori nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Todori v. İsteryano nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûre hudûdu dâhilinde vâki‘ bir tarafdan Mihal v. Malata bağı ve bir tarafdan Kirici v. Nikola bağı ve bir tarafdan Yorgi v. ( ) bağı ve bir tarafdan Dimitri bağı ile mahdûd ve mümtâz sekiz çapalık mülk bağımı mezbûr Todori’ye fıddî nakd-i râyic fi’l-vakt dokuz bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr dokuz bin beş yüz akçeyi mezbûr Todori yedinden tamâmen alıp kabz edip mebî‘-i mezbûru mahallinde zabt ve tasarrufa mezbûr Todori’yi taslît eyledim ba‘de’l-yevm zikr olunan bağ mezbûr Todori’nin mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-hâmis min Recebi’l-ferd li sene seb‘a ve erba‘în ve elf. Şuhûdü’l-hâl: Mahmud b. Ahmed, Mustafa b. Veli, Cafer b. Abdullah, İsteryano [v.] Hristo, İstani [v.] Dimitri, Dimitri [v.] Atanaş, Yorgi [v.] İsteryano, Franko [v.] Dimo, Dimitri [v.] Nikola, Yorgi [v.] Nikola, Dimitri.