Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 195 Hüküm no: 212 Orijinal metin no: [34b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ferhad ile Ramazan b. Hacı Osman’ın boşandığı ve birbirlerinin zimmetini ibra ettiği Mahmiye-i Kostantıniyye hısnı ebvâbından Eğrikapı hâricinde vâki‘ Takyecibaşı mahallesinde sâkine Fâtıma bt. Ferhad nâm hâtun mahfil-i kazâda zevc-i mutallıkı Ramazan b. el-Hâc Osman muvâcehesinde bi tav‘ihâ ikrâr ve i‘tirâf edip mezbûr Ramazan beni tatlîk etmeğin zimmetinde mütekarrir olan bin akçe mehr-i müeccelimi ve beş yüz akçe nafaka-i iddetimi ve bir ön gümüşlü kuşağımı mezbûrun yedinden alıp kabz edip zevciyyete müte‘allik cemî‘ de‘âvî [ve] husûmâtdan zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm zevciyyete müte‘allik benden bi’l-asâle veya bi’l-vekâle da‘vâ sudûr ederse lede’l-hükkâm-ı zevi’l-ihtirâm mesmû‘a ve makbûle olmasın dedikde mukırra-i merkūmenin ikrâr-ı meşrûhunu el-mukarru lehü’l-merkūm Ramazan vicâhen tasdîk ve şifâhen tahkīk edicek mâ vaka‘a ketb olundu. Hurrire fî evâili Recebi’l-ferd li sene seb‘a ve erba‘în ve elf. Şuhûdü’l-hâl: Receb Efendi b. ( ) el-İmâm, Mustafa b. Ramazan, Ali Çelebi el-Kâtib, Yakub b. Kurd.