Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 195 Hüküm no: 213 Orijinal metin no: [34b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Veli’nin Bîzebân Ali b. Ahmed’e olan borcunu ödemesi Râfi‘-i hâze’l-kitâb Ali b. Ahmed nâm bî-zebân mahfil-i kazâda medîne-i Hazret-i Ebî Eyyûb el-Ensârî mahallâtından Baba Haydar mahallesinde sâkine Hatice bt. Veli nâm kimesne muvâcehesinde ta‘bîr-i makāmîye kāim olan işâret-i ma‘hûdesi ile üzerine takrîr-i da‘vâ edip bundan akdem mezbûre Hatice Hâtun benden karz-ı hasen dört bin akçe alıp mukābelesinde bir tek cevher altın bilezik ve bir gerdan ta‘bîr olunur kafes inci rehin vaz‘ eylemişidi ba‘dehû düğüne giderim düğünde isti‘mâl edeyim deyû zikr olunan bilezik ve inciyi benden alıp meblağ-ı merkūm dört bin akçe zimmetinde kalmışdır suâl olunup meblağ-ı mezbûru alıverilmek matlûbumdur dedikde gıbbe’s-suâl mezbûre Hatice Hâtun cevâbında, fi’l-hakīka mezbûr bî-zebân Ali’den dört bin akçe istikrâz edip zikri sebk eden bilezik ve inciyi rehin vaz‘ eylemiş idim ba‘dehû mezbûr bî-zebân Ali’nin bir memlûke câriyesi firâr edip bir kimesnenin yedinde bulundukda zikr olunan câriye müjdegânesine ve sâir da‘vâsına ve çavuş harcına mezbûr Ali’nin emri ile altı bin akçe istikrâz olunmak lâzım gelmekle, mezbûr Ali zikr olunan bilezik ve inciyi bana verip ben dahi bir kimesneye rehin vaz‘ edip merkūm Ali’ye kendi emri ile altı bin akçe alıverip câriyenin mesârifine sarf edip ba‘dehû mebâliğ-i mezbûr altı bin akçeyi sâhibine ben edâ eylemiş idim deyicek mezbûr bî-zebân Ali husûs-ı mezbûru bi’l-külliye münkir olup merkūme Hatice Hâtun cevâbını beyâna kādir olmayıp merkūm bî-zebân Ali’yi istihlâf etmeğin ol dahi mezbûre Hatice Hâtun’a husûs-ı mezbûr için altı bin akçe istikrâz etmeye emr etmediğine ve zikr olunan bileziği ve inciyi ol mukābelede ref‘ etmediğine yemîn billâhi’l-aliyyi’l-azîm etmeğin mezbûre Hâtun’a zikr olunan dört bin akçeyi mezbûr bî-zebân Ali’ye edâya tenbîh olunup mâ hüve’l-vâki‘ ketb olundu. Hurrire fî evâili Recebi’l-ferd târihi’l-mezbûr. Şuhûdü’l-hâl: Abdurrahman Efendi b. Abdullah, İbrahim Çelebi b. Musa, Mehmed b. Hasan, Mahmud b. Ahmed, Mustafa b. Veli ve gayruhü[m.