Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 196 Hüküm no: 214 Orijinal metin no: [34b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın evine yaptığı kenifin, komşusu Hacı Mustafa b. Abdullah’ın su kuyusuna zarar verdiği Medîne-i Hazret-i Ebî Eyyûb el-Ensârî mahallâtından Takyecibaşı mahallesinde sâkin el-Hâc Mustafa b. Abdullah mahfil-i kazâya gelip takrîr-i kelâm edip mahalle-i mezbûrede sâkin olduğum mülk menzilimde vâki‘ yedi kulaç bi’r-i mâya beş altı zirâ‘ karîb mahalde câr-ı mülâsıkım olan Mehmed b. Abdullah nâm kimesne kendi menzilinde hâlâ bir kenîf ihdâs etmekle benim menzilimde olan bi’r-i mâya sirâyet edip bi’r-i mâ isti‘mâlden kalmışdır savb-ı şer‘-i kavîmden üzerine varılıp keşf ve müşâhede olundukdan sonra zarar def‘ olunmak matlûbumdur dedikde taraf-ı şer‘den mevlânâ Mustafa irsâl olunup ol dahi hâssa mi‘mârlardan üstâd el-Hâc Hasan b. Ömer ve zeyl-i kitâbda muharrerü’l-esâmî olan müslimîn ile menzil-i mezbûra varıp zikr olunan kenîfin bi’r-i mâya zararın müşâhede eylediklerinde fi’l-hakīka mârrü’z-zikr bi’r-i mâ’ın umku yedi kulaç olup ve kenîfin bi’r-i mâya bu‘du altı zirâ‘ olup mahall-i mezbûrun [35a] arzı dahi duhûl olmağla zikr olunan kenîfin bi’r-i mezbûra sirâyeti ve zararı mukarrer olduğuna mi‘mâr-ı mezbûr ve sâir ahâlî-i vukūf ictimâ‘ ve ittifâk eylediklerinde mevlânâ-yı mezbûr zikr olunan kenîfi def‘a mezbûr Mehmed’e tenbîh eylediğini mahallinde tahrîr, ba‘dehû meclis-i şer‘de alâ vukū‘ihî ihbâr ve takrîr etmeğin mâ hüve’l-vâki‘ ketb olundu. Fî evâili Recebi’l-mürecceb li sene seb‘a ve erba‘în ve elf. Şuhûdü’l-hâl: İshak Efendi b. Veli el-İmâm, Ahmed Çelebi b. Hasan, Hızır Çelebi b. Mustafa, Yakub b. Kurd ve gayruhüm.