Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 197 Hüküm no: 215 Orijinal metin no: [35a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer Paşa Vakfı’nın önceki ve sonraki mütevellileri arasındaki vakıf hesabının görülmesi Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-’de vâki‘ merhûm Cafer Paşa vakfı’na sâbıkan mütevellî olan Çene Mehmed Çelebi b. Mahmud nâm râcil mahfil-i kazâda evkāf-ı mezbûrede bi’l-fi‘l mütevellî olan bâ‘isü hâze’l-kitâb diğer Mehmed Beşe b. Hamza mahzarında ikrâr ve takrîr-i kelâm edip tevliyyet-i merkūmeden münfasıl olduğumda merkūm Mehmed Beşe evkāf-ı mezbûrun nâzırı ve mürtezikası ma‘rifetleri ile muhâsebemi gördüklerinde beynimizde münâza‘un-fîh olan on iki bin yedi yüz akçeden gayr-ı ba‘de külli hesâb cânib-i vakf-ı mezbûra edâsı lâzım zimmetimde otuz bin üç yüz kırk akçe zuhûr etmeğin meblağ-ı mezbûrun beş bin akçesini işbu hâzır bi’l-meclis odabaşımız Mustafa Beşe b. Abdullah’dan havâle-i sahîha-i şer‘iyye ile müteveffâ-yı mezbûr Mehmed Beşe’ye havâle edip ol dahi zikr olunan havâleyi kabûl edip ve on bin akçe dahi medîne-i mezbûre mahallâtından Aşçıbaşı mahallesinde sâkin işbu hâzır bi’l-meclis olan Mustafa Halîfe b. Yusuf târih-i kitâbdan yüz seksen gün tamâmına değin edâ etmek üzre tarafeynden emr ve kabûlü hâviye kefâletle kefîl bi’l-mâl olup ve on bin üç yüz kırk akçesi mukābelesinde dahi yine medîne-i mezbûrede Takyecibaşı mahallesinde vâki‘ bir tarafı sulbiye kızımız Âişe Hâtun mülkü ve bir tarafı İbrahim Reis mülkü ve bir tarafı mekābir-i müslimîn ve taraf-ı râbi‘i tarîk-i âm ile mahdûd ve mümtâz olan mülk menzilimi derkine işbu hâzır bi’l-meclis olan dâmâdım Mustafa Bey b. Mehmed nâm cündî kefîl oldukdan sonra bey‘-i bi’l-vefâ ile bey‘ edip târih-i kitâbdan yine yüz seksen gün tamâmına değin meblağ-ı mezbûr on bin üç yüz kırk akçeyi cânib-i vakfa edâ etmez isem bey‘-i mezbûr bâtta münkalib olsun deyip mütevellî-i merkūm Mehmed Beşe dahi vech-i meşrûh üzre menzil-i mezbûru vakf için iştirâ ve kabûl eyleyip ve bâkī kalan altı bin akçe mukābelesinde dahi bir büyük beyaz dîvân kaliçesi mütevellî-i mezbûr Mehmed Beşe’ye rehin vaz‘ ve teslîm edip yine yüz seksen gün tamâmına değin edâya ta‘ahhüd eyledim dedikde mütevellî-i sâbık Çene Mehmed Çelebi’nin ber vech-i meşrûh cârî olan ikrâr ve takrîrini mütevellî-i merkūm Mehmed Beşe vicâhen ve şifâhen tasdîk ve tahkīk eyledikden sonra merkūm Mustafa Halîfe b. Yusuf meblağ-ı mezbûr on bin akçeye ve mersûm Mustafa b. Mehmed menzil-i mezbûrun derkine tarafeynden emr ve kabûlü hâviye kefâletle olduklarını her biri meclis-i şer‘de mukarrer ve mu‘terif olmağın mâ hüve’l-vâki‘ gıbbe’t-taleb ketb olundu. Hurrire fî evâhiri Cumâdelâhire li sene seb‘a ve erba‘în ve elf. Şuhûdü’l-hâl: Abdurrahman Çelebi b. Habib, Ali Çelebi b. Sefer, Süleyman Ağa b. Hüseyin, İsmail Efendi el-Müderris, eş-Şeyh Ramazan Efendi, Mehmed Efendi b. Murad, Seydi Çavuş b. Receb, Sefer Halîfe el-İmâm, Osman Beşe er-Râcil.