Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 198 Hüküm no: 216 Orijinal metin no: [35a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultana bt. Gavriye’ye kocasının ücreti karşılığında yeni bir ev yapması Havâss-ı Aliyye müzâfâtından kasaba-i Silivri mahallâtından Manastır mahallesinde sâkine sâhibetü’l-kitâb Sultana bt. Gavriye nâm Yahudiye mahfil-i kazâda zevci Kemel v. Agop muvâcehesinde üzerine takrîr-i da‘vâ edip zevcem mezbûre Kemel’e târih-i kitâbdan bir kaç sene mukaddem kasaba-i Çorlu’da vâki‘ lede’l-ahâlî ve’l-cîrân ma‘lûmü’l-hudûd mülk menzilimi ve ka[sa]ba-i mezbûre kurbunda ma‘lûmü’l-hudûd bir kıt‘a mülk bağımı ve yüz miskāl bir çift altın bilezik ve on beş miskāl inci ve dört atlas zenne kaftan ve bir samur kürkü safka-i vâhide ile cem‘an altmış bin fıddî akçeye bâtten bey‘ ve teslîm edip ol dahi vech-i meşrûh üzre iştirâ ve kabûl eyledikden sonra semen-i mezbûr altmış bin akçe mukābelesinde kasaba-i mezbûr Silivri’de teceddüden bana bir menzil binâ edivermek üzre müte‘ahhid olmuşdu hâlâ kasaba-i mezbûre Silivri’de mahalle-i mezbûrede vâki‘ bir tarafdan Dika nâm zimmî mülkü ve bir tarafdan Kologo nâm zimmî [35b] mülkü ve bir tarafı Kiryaki nâm zimmî mülkü ve bir tarafdan Yasef nâm Yahudi mülkü ile mahdûd iki bâb fevkānî beyti ve selâmlığı ve altında ahırı ve altında bir çardağı ve muhavvatayı müştemil menzil benim malım ile teceddüd binâ edip altı ay mukaddem bana semen-i mezbûr mukābelesinde temlîk ve teslîm eylemiş iken hâlâ tasarrufuma mâni‘ olup âhara bey‘ etmek murâd eder suâl olunup ihkāk-ı hak olunmak matlûbumdur dedikde gıbbe’s-suâl mezbûr Kemel, fi’l-hakīka zevcesi müdde‘iye-i mezbûra menzil-i mezbûru ve bağ ve eşyâ-i merkūmeyi semen-i mezbûr altmış bin akçeye iştirâ eyleyip meblağ-ı mezbûr zimmetinde olduğunu ikrâr edip teceddüd binâ eylediği menzil-i merkūm zevcesi müdde‘iye-i mezbûre için binâ edip ve ba‘dehû ber vech-i meşrûh üzre temlîk ve teslîm eylediğini inkâr ile cevâb vermeğin müdde‘iye-i mezbûreden takrîrine mutâbıka beyyine taleb olundukda ityân-ı beyyineden âcize olup zevci mezbûr Kemel’i müceddeden binâ eylediği menzili, meblağ-ı mezbûr mukābelesinde kendiye altı ay mukaddem temlîk ve teslîm eylemediğine istihlâf etmeğin mezbûr Kemel’e vech-i merkūm üzre yemîn teklîf olundukda yemînden nükûl edip ba‘dehû menzil-i mezbûru minvâl-i merkūm üzre zevcesi mezbûre Sultana’ya meblağ-ı mezbûr altmış bin akçe mukābelesinde târih-i kitâbdan altı ay mukaddem def‘ ve teslîm eylediğini bi tav‘ihî ikrâr etmeğin mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâbi‘ min Recebi’l-mürecceb li sene seb‘a ve erba‘în ve elf. Şuhûdü’l-hâl: Receb Efendi b. Abdi, İbrahim b. Osman, Abdullah Dede b. Abdullah, Şaban Halîfe b. Mustafa el-Müezzin, Mahmud b. Ahmed, Hamana? v. Avraham, Mosi v. Metşi ve gayruhüm.