Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 199 Hüküm no: 217 Orijinal metin no: [35b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Abdullah’ın cenazesinin keşf ve muayenesi Havâss-ı Refî‘a kazâsı müzâfâtından Terkos nâhiyesine tâbi‘ Çiftalan nâm karye ahâlîsinden Ömer b. Abdullah ve Mehmed b. Yakub ve Tayyib b. Hasan ve Mehmed b. Abdi el-Hâc Hasan b. Abdullah ve Abdülfettâh Çelebi b. Mehmed nâm kimesneler meclis-i şer‘-i şerîfe gelip takrîr-i kelâm edip işbu târih-i kitâb şehrinin altıncı vâki‘ olan isneyn günü karye-i merkūme sükkânından Ali b. Abdullah nâm kimesne mahmiye-i İstanbul’dan araba ile karye-i merkūmeye gider iken merhûm ve mağfûrun-leh Sultan Süleyman Hân kemerleri kurbunda Elmalıdere demekle ma‘rû[f] olan hâlî ve mahûf mahalde, başında üç yerinde bıçak ile urulup ve burun ve iki kulağını kat‘ olunmuş kābil-i nutk olmayıp cârihinden ta‘bîre kādir değildir helâk olmak ihtimâli vardır cânib-i şer‘den âdem irsâl olunup cerâhati keşf ve tahrîr olunmak matlûbumdur dediklerinde savb-ı şer‘-i kavîmden mevlânâ Receb Efendi irsâl olunup ol dahi karye-i merkūme subaşısı olan Mehmed Ağa ve zeyl-i kitâbda mastûrü’l-esâmî olan müslimîn ile karye-i merkūmeye vardıklarında mecrûh-ı mezbûr Ali cerâhat-i merkūmeden fevt olmuş bulunup meyyitini keşf eylediklerinde minvâl-i meşrûh üzre başında üç yerinde bıçak cerâhati olup ve burnu ve iki kulakları maktû‘ bulunup Pinhor nâm karyeden Süleyman b. Mahmud ve Veli b. Durmuş ve Hasan b. Abdullah ve Ali b. Hasan nâm kimesneler mezbûr Ali’yi zikr olunan Elmalıdere’de yevm-i merkūmda vech-i meşrûh üzre mecrûh görüp nutka kādir olmamağla cârihinden ihbâr edemedi dediklerini ve mezbûr Ali’nin vârisesinden sulbî sagīr oğlunun vâlidesi Sâliha bt. Abdullah nâm hâtun karye-i merkūme ahâlîsinden bir ferd ile da‘vâm ve talebim yokdur dediklerini mahallinde keşf ve tahrîr edip ba‘dehû gelip meclis-i şer‘de vukū‘u üzre ihbâr ve takrîr etmeğin mâ hüve’l-vâki‘ ketb olundu. Tahrîren fî evâili Recebi’l-ferd li sene seb‘a ve erba‘în ve elf. Şuhûdü’l-hâl: Mehmed b. Ahmed, Mustafa b. Mehmed er-Râcil, Ali b. Hamza, Yakub b. Bayram, Ömer b. Abdullah, Sâlih b. Hüseyin ve gayruhüm.