Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 199 Hüküm no: 218 Orijinal metin no: [35b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali ve Süleyman’ın tarlalarını Andriye v. Mihal’e satmaları Vilâyet-i Rumeli’nde İstarova kazâsına tâbi‘ Büyük Hacme nâm karye sâkinlerinden Ali b. Süleyman kendi tarafından asâleten ve li ebeveyn karındaşı Abdi tarafından tefvîz-i âti’z-zikri ikrâra vekîl olup vekâleti Yakub b. Mustafa ve Hüseyin b. Abdullah şehâdetleri ile şer‘an sâbite oldukdan sonra vekâleten mahfil-i kazâda [36a] işbu hâmilü’s-sifr Andriye v. Mihal nâm zimmî muvâcehesinde ikrâr ve i‘tirâf edip karye-i mezbûre hudûdu dâhilinde vâki‘ bir tarafdan Ali b. Kurd mülkü ve bir tarafdan Peto v. Yuvan ve bir tarafdan tarîk-i âm ve bir tarafdan arz-ı hâliye ile mahdûd ve tahmînen on keyl tohum istî‘âb eder ale’l-iştirâki’s-seviy taht-ı tasarrufumuzda olan bir kıt‘a tarlanın hakk-ı tasarrufunu, sâhib-i arz ma‘rifeti ile mezbûr Andriye’ye târih-i kitâbdan yedi ay mukaddem iki bin dört yüz akçe mukābelesinde tefvîz edip ol dahi tefevvuz ve kabûl eyledikden sonra mukābele-i tefvîzde mezbûr Andriye yedinden meblağ-ı mezbûr iki bin dört yüz akçeyi ahz ve kabz edip zikr olunan tarlayı mahallinde zabt ve tasarrufa mezbûr Andriye’yi taslît eylemiş idik zikri sebk eden tarla mezbûr Andriye’nin dâhil-i tahtı tasarrufu olmuşdur dedikde mukırr-ı mezbûr Ali’nin minvâl-i muharrer üzre bi’l-asâle ve bi’l-vekâle cârî olan ikrârı el-mukarru lehü’l-merkūm Andriye bi’l-muvâcehe tasdîk etmeğin mâ vaka‘a ketb olundu. Fi’l-yevmi’s-sâbi‘ min Recebi’l-mürecceb li sene seb‘a ve erba‘în ve elf. Şuhûdü’l-hâl: Süleyman b. Hüseyin, Hasan b. Çavuş, Mehmed b. Hüseyin, Hüseyin b. Abdullah, Yakub b. Kurd.