Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 200 Hüküm no: 219 Orijinal metin no: [36a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Çelebi’nin varisleri arasındaki anlaşmazlıkta süre verilmesi Mahmiye-i Kostantıniyye mahallâtından Cezerî Kasım Paşa mahallesinde sâkin iken bundan akdem vefât [eden] merhûm Yusuf Çelebi b. ( ) nâm müteveffânın verâseti sulbiye kebîre kızları Hatice ve Râbia nâm hâtunlara münhasıra olduğu şer‘an mütebeyyin oldukdan sonra medîne-i Hazret-i Ebî Eyyûb el-Ensârî mahallâtından Hamza Bey mahallesinde sâkine olan mezbûre Hatice Hâtun tarafından husûs-ı âti’z-zikre vekîl olup hasm-ı câhid mahzarında mezbûreyi ma‘rifet-i şer‘iyye ile ârifân olan İbrahim Çelebi b. Abdullah ve Mustafa b. Abdullah şehâdetleri ile şer‘an vekâleti sâbite olan zevci Hasan Efendi b. İbrahim el-Hatîb mahfil-i kazâda müteveffâ-yı mezbûrun muhallefâtına vâzı‘atü’l-yed olan mezbûre Râbia Hâtun tarafından dahi merkūm Hasan Efendi ile husûmete ve redd-i cevâba vekîl olup kezâlik merkūmeyi ma‘rifet-i şer‘iyye ile ârifân olan Sâlih Bey b. Mahmud ve Nasuh Halîfe b. Hızır şehâdetleri ile şer‘an vekâleti sâbite olan Ali Bey b. Mehmed mahzarında bi’l-vekâle üzerine takrîr-i da‘vâ edip mezbûre Râbia Hâtun müteveffâ-yı mezbûrun muhallefâtından beynimizde ma‘lûm ba‘zı eşyâsını müvekkile-i mezbûre Hatice Hâtun’dan ihfâ eylemiş hâlâ ihfâ eylediği eşyâdan müvekkileme âid olan hisse-i şer‘iyyesini da‘vâ ve taleb ederim suâl olunsun dedikde gıbbe’s-suâl vekîl-i mezbûr Ali Bey cevâbında, müvekkiletân-ı mezbûretân Hatice Hâtun ve Râbia Hâtun müteveffâ-yı mezbûrun terekesini mâbeynlerinde ba‘zısın füruht edip semenin taksîm ve ba‘zısına dahi bahâ takdîr edip bahâsı ile taksîm eylediklerinden sonra mâbeynlerinde min ba‘d nizâ‘ ve husûmet olmamak üzerine vekîl-i mezbûr Hasan Efendi’ye müvekkilesi ma‘rifetiyle bin nakd-i râyic fi’l-vakt akçe dahi verip mezbûr Hasan Efendi vekâleten müvekkilem mezbûre Râbia Hâtun’un zimmetini ibrâ eylemiş idi deyicek gıbbe’l-istintâk vekîl-i mezbûr Hasan Efendi zikr olunan da‘vâdan bin akçeyi taksîm olunan eşyâdan gayrı bir güğüm ve bir yorgan merkūme Râbia Hâtun yedinde kalmağın müvekkileme isâbet eden hissesi mukābelesinde ahz eyledim deyip vech-i muharrer üzre olan sulh ve ibrâyı inkâr ile cevâb vermeğin vekîl-i merkūm Ali Bey’den takrîrine mutâbık beyyine taleb olundukda ityân-ı beyyineden âciz olup mezbûr Hasan Efendi’yi istihlâf etmeğin ol dahi alâ vefki’l-mes’ûl yemîn billâhi’l-aliyyi’l-azîm eyledikden sonra mezbûr Hasan Efendi’nin vekâleten da‘vâ eylediği eşyâ vekîl-i merkūm Ali Bey’den suâl olundukda müvekkilem mezbûre Râbia Hâtun’dan istifsâr edeyim deyû cevâb vermeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min şehri Recebi’l-mürecceb li sene seb‘a ve erba‘în ve elf. Şuhûdü’l-hâl: Şeyhzâde Mehmed Efendi, Sefer Efendi el-İmâm, Mustafa Çavuş, Ahmed Bey b. ( ), Mehmed Beşe er-Râcil, Mahmud b. Ahmed, Mehmed b. Abdullah, Mustafa Beşe çukadâr ve gayruhû.