Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 201 Hüküm no: 220 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saime bt. Ali Çavuş’un evini torunu Emine Hatun’a hibe etmesi Medîne-i Hazret-i Ebî Eyyûb el-Ensârî mahallâtından Ali Paşa-yı Cedîd mahallesinde sâkine Sâime bt. Poşpoşî Ali Çavuş nâm hâtun tarafından husûs-ı âti’z-zikri ikrâra vekîl olup hasm-ı câhid mahzarında mezbûre Sâime Hâtun’u ma‘rifet-i şer‘iyye ile ârifeyn olan Mehmed b. Murtaza ve Abdülkerim b. Sarı Ahmed şehâdetleri ile şer‘an vekâleti sâbite olan Mustafa Halîfe b. Mehmed el-Mu‘allim mahfil-i kazâda işbu bâ‘isü’l-kitâb mezbûre Sâime Hâtun’un sadrî oğlu olup bundan akdem müteveffâ olan Hasan Çavuş’un sulbiye kızı Emine Hâtun tarafından ikrâr-ı âti’z-zikri tasdîka vekîl olup ber nehc-i şer‘î üzre vekâleti sâbite olan zevci Ahmed Çelebi b. Abdülkerim mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Sâime Hâtun mahalle-i merkūmede vâki‘ bir tarafı Osman Ağa mülkü ve bir tarafı hemşîresi Rahime Hâtun ve bir tarafı merhûm Ali Paşa bostanı ve bir tarafı tarîk-i âm ile mahdûd fevkānî bir odayı ve tahtânî üç odaları ve ahırı ve kenîfi ve müşterek bi’r-i mâyı ve hadîkayı müştemil olan mülk menzilini, mezbûre Emine’ye şerâit-i sıhhati câmi‘a mevâni‘-i rücû‘dan âriye hibe-i sahîha-i şer‘iyye ile hibe ve temlîk ve teslîm eyleyip mezbûre Emine dahi meclis-i hibede ittihâb ve kabûl ve kabz ve tesellüm eyledi min ba‘d mülk-i mevhûbudur keyfe mâ yeşâ’ ve tahtâr mutasarrıfa olsun dedikde mukırr-ı merkūm Mustafa Halîfe’nin minvâl-i muharrer üzre bi’l-vekâle cârî olan ikrâr ve takrîrini vekîl-i âhar Ahmed Çelebi vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Târihuhü’l-mezbûr. Şuhûdü’l-hâl: Veli Efendi b. Abdullah, Receb Efendi b. Abdi, Mustafa Çelebi b. Ali, Abdi Beşe b. Ali, Mustafa Çelebi b. Veli, Mustafa b. Mahmud, Mustafa b. Mehmed.