Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 202 Hüküm no: 221 Orijinal metin no: [36b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Nartor’un bağını Anaz’a sattığı Vilâyet-i Anadolu’da Eğin kazâsına tâbi‘ Gemirgob nâm karyeden Yani v. Nartor nâm Ermeni mahfil-i kazâda râfi‘-i hâze’l-kitâb Anaz v. Mirhan nâm Ermeni muvâcehesinde bi tav‘ihî ikrâr ve i‘tirâf edip işbu akdin sudûruna değin silk-i mülkümde olup kazâ-i mezbûre tevâbi‘inden Karşula nâm karye hudûdu dâhilinde vâki‘ bir tarafdan Avanos v. Tolni mülkü ve bir tarafdan su taraf-ı râbi‘i arz-ı hâliye ve bir tarafdan Narin nâm Ermeni mülkü ile mahdûd olup Kündün harkı demekle ma‘rûf su harkından her on günde bir gün sabahdan vakt-i zuhra değin hakk-ı şirbi olan tahmînen bin kütüklü bir kıt‘a mülk bağımı yanında bir mikdâr arz-ı hâliyesi ile mezbûr Anaz’a iki yüz on riyâlî guruşa bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzre iştirâ ve kabûl eyledikden sonra zikr olunan iki yüz on riyâlî guruşu bi tamâmihî yedinden ahz ve kabz edip zikr olunan bağı mahallinde ahz ve kabza mezbûr Anaz’ı taslît eyledim ba‘de’l-yevm sâlifü’z-zikr bağ mezbûr Anaz’ın mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ ketb olundu. Hurrire fî evâili Recebi’l-ferd li sene seb‘a ve erba‘în ve elf. Şuhûdü’l-hâl: Mustafa Çelebi b. Abdullah, Osman Beşe b. Abdullah, Mustafa b. Veli, Mahmud b. Ahmed, Arzuman v. Murat, Avanos v. Tornaz, Honi v. Mihrican, Honi v. Serkis.