Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 202 Hüküm no: 222 Orijinal metin no: [36b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaptanlık yapmasına izin verilen Natali v. Ocar’a Mehmed Bey b. Ali Paşa’nın kefil olduğu Mahmiye-i Galata müzâfâtından Kasım Paşa mahallâtından Tahtakadı mahallesinde sâkin Tersâne-i âmire kapudânlarından kıdvetü’l-emâsil ve’l-akrân Ali Kapudân b. Abdülmennân mahfil-i kazâda işbu hâzır bi’l-meclis orta boylu açık kaşlı koyun elâ gözlü kızıl benizli ensesinin sol yanında eser-i cerâhati olup rıkkını mu‘terif olan Franciyyü’l-asl Natali v. Ocar nâm abd-i memlûkün mevlâsı hâmil-i hâze’l-kitâb kıdvetü’l-ümerâ’i’l-kirâm Mehmed Bey b. el-merhûm Ali Paşa tarafından ikrâr-ı âti’z-zikri tasdîka vekîl olup hasm-ı câhid mahzarında nehc-i şer‘î üzre [37a] vekâleti sâbite olan umdetü’l-a‘yân diğer Ali Kapudân b. Murad mahzarında ikrâr ve i‘tirâf edip müvekkil-i müşârün-ileyh Mehmed Bey merkūm Natali’yi Kapudân ıtlâk edip kâr ve kisb etmek için izin vermekle, ben dahi mezbûr Natali’nin nefsine kefîl olup firâr ederse kıymeti olan yüz elli kıt‘a riyâlî guruşu zâmin olmak üzre müte‘ahhid oldum dedikde mukırr-ı mezbûr Ali Kapudân’ın ber vech-i meşrûh cârî ve sâdır olan ikrâr ve i‘tirâfını vekîl-i mezbûr Ali Kapudân vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Tahrîren fi’l-yevmi’t-tâsi‘ min şehri Recebi’l-mürecceb li sene seb‘a ve erba‘în ve elf. Şuhûdü’l-hâl: Hasan Efendi b. İbrahim el-Hatîb, Mustafa Çelebi b. Hasan, Rıdvan b. Abdullah, Mustafa b. ( ) çukadâr ve gayruhüm.