Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 216 Hüküm no: 206 Orijinal metin no: [27a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen el-Hâc Hüseyin Beşe b. Mehmed’den karısı ve çocuklarına kalan evin Safiye bt. Abdülmümin’e satıldığı Mahmiye-i İstanbul’da Çukur mahalle[si] sükkânından iken bundan akdem vefât eden el-Hâc Hüseyin Beşe b. Mehmed’in verâseti zevce-i metrûkesi Safiye bt. Şaban ve oğlu Mehmed ve kızı Âişe’ye münhasıra olduğu şer‘an sâbit oldukdan sonra mezbûrûn Mehmed ve Âişe ve Safiye meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bâ‘isetü’l-kitâb diğer Safiye bt. Abdülmümin nâm hâtun mahzarında her biri ikrâr ve takrîr-i kelâm edip tereke-i müteveffâ-yı mezbûrdan olup mahalle-i mezbûrede vâki‘ bir tarafdan Mehmed Beşe b. ( ) mülkü ve bir tarafdan tarîk-i âm ve iki tarafdan es-Seyyid Mehmed Yorgānî vakfı’ndan olan menziller ile mahdûd iki bâb fevkānî ve bir bâb tahtânî odaları ve havlu ve kenîfi müştemil mülk menzili mezbûre diğer Safiye Hâtun’a tarafeynden îcâb ve kabûlü hâvî şurût-ı müfsideden ârî bey‘-i bâtt-ı şer‘î ile iki yüz on esedî guruşa bey‘ ve teslîm edip ol dahi iştirâ ve tesellüm ettiğinden sonra semen-i mezbûrdan her birimiz hissemizi mezbûre diğer Safiye yedinden tamâmen ahz u kabz eyledik, min ba‘d menzil-i mahdûd-ı mezbûr merkūme diğer Safiye Hâtun’un mülk-i müşterâsıdır keyfe mâ teşâ’ ve tahtâr mutasarrıfe olsun dediklerinde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sânî min Cumâdelâhire li sene seb‘a ve seb‘în ve elf. Şuhûdü’l-hâl: Hüseyin Efendi b. Abdülfettâh, umdetü’l-küttâb Mehmed Çelebi b. Mahmud, zahrü’l-emsâl Abdullah Çelebi b. Mehmed Çelebi, Receb Halîfe b. el-Müezzin, Abdi Çelebi b. Hüseyin.