Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 217 Hüküm no: 207 Orijinal metin no: [27a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Timurhan bt. Abdullah’ın kocası Dellâl Mustafa Beşe’den mehr-i müeccel bahasından alacaklı olduğu Mahmiye-i İstanbul’da Çivizâde mahallesi sâkinelerinden Timurhan bt. Abdullah nâm hâtun meclis-i şer‘-i hatîr-i lâzımü’t-tevkīrde zevc-i dâhilün-bihâsı Dellâl Mustafa Beşe b. Abdullah nâm kimesne tarafından husûs-ı âti’l-beyâna vekîl olduğu mahalle-i mezbûre sükkânından Mehmed Beşe b. Mustafa ve kapıcı Mehmed Çelebi b. Abdullah nâm kimesneler şehâdetleri ile şer‘an sâbit olan Mehmed Bey b. Ahmed nâm kimesne mahzarında bi’t-tav‘i’s-sâf ikrâr ve i‘tirâf edip zevcim müvekkil-i mezbûr târih-i kitâbdan on sene mukaddem sekiz miskāl altından masnû‘ bir bilezik ile elli dirhem sîmden masnû‘ bir raht kuşağını bana hibe ve teslîm edip ben dahi meclis-i hibede ittihâb ve kabûl ve tesellüm eylemiş idim, hâliyâ zevcim müvekkil-i mezbûr dahi zimmetinde mütekarrir ve ma‘kūdun-aleyh olan bin beş yüz akçe mehr-i müeccel müsemmâmın bin akçesini bana edâ ve teslîm edip ben dahi yedinde ahz u kabz eyledim, zikr olunan bilezik ile kuşak târih-i mezbûrdan beri benim mülk-i mevhûbum olup zevcim müvekkil-i mezbûrun kat‘â alâka ve medhali kalmayıp benim dahi zevcim müvekkil-i mezbûr zimmetinde mehr-i müeccel-i müsemmâmdan ancak semeninden beş yüz akçe hakkım bâkī kalmışdır dedikde, vekîl-i mezbûr Mehmed Bey mukırre-i mezbûreyi cemî‘ kelimâtından vicâhen tasdîk ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Abdi Çelebi b. Hüseyin, korucu Hasan Beşe b. Mahmud, Mehmed Bey b. ( ), Ahmed Çelebi b. Abdullah, Mustafa b. Ali, nakkaş Ali Çelebi, Çorbacızâde Ahmed Çelebi, İmâm Hasan Efendi b. Habib.