Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 203 Hüküm no: 223 Orijinal metin no: [37a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa’nın Abdurrahman Efendi b. Abdullah ile Mahmud Efendi b. Mehmed’den borç aldığı Medîne-i Ebî Eyyûb el-Ensârî’de vâki‘ merhûm Hamza Mescid-i şerîfinde imâm olan işbu bâ‘isü’l-kitâb Abdurrahman Efendi b. Abdullah mahfil-i kazâda Mahmud Efendi b. Mehmed mahzarında üzerine takrîr-i da‘vâ edip dergâh-ı âlî kapıcıbaşılarından Ahmed Ağa nâm kimesne târih-i kitâbdan üç sene mukaddem bizden otuz altı bin iki yüz nakd-i râyic fi’l-vakt fıddî akçe istikrâz edip biz dahi meblağ-ı merkūmu ale’s-seviyye kendi malımızdan ikrâz ve teslîm eylemişdik hâlâ mezbûr Mahmud Efendi meblağ-ı mezbûrun yirmi yedi bin akçesini mûmâ-ileyh Ahmed Ağa’dan ahz ve kabz eylemiş vâki‘ hâl suâl olunup takrîri tahrîr olunmak matlûbumdur dedikde gıbbe’s-suâl mezbûr Mahmud Efendi müşârün-ileyh Ahmed Ağa’ya vech-i meşrûh üzre müdde‘î-i merkūm Abdurrahman Efendi ile kendi mâllarından ale’s-seviyye otuzar altı bin iki yüz akçe ikrâz ve teslîm eylediklerini ve meblağ-ı mezbûrun yirmi yedi bin akçesini ahz ve kabz eylediğini bi’t-tav‘i’s-sâf ikrâr ve i‘tirâf eylemeğin vâki‘ hâl hıfzan li’l-makāl bi’t-taleb ketb olundu. Fi’l-yevmi’l-hâmis min Recebi’l-mürecceb li sene seb‘a ve erba‘în ve elf. Şuhûdü’l-hâl: Abdülkādir Çelebi b. Mehmed, Mehmed b. Abdullah, Baba Cafer b. Abd[ullah], Veli b. Mehmed.