Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 203 Hüküm no: 224 Orijinal metin no: [37a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Reis b. Receb’in Abdülbâki Çelebi’ye borcu kalmadığı Medîne-i Hazret-i Ebî Eyyûb el-Ensârî mahallâtından Çavuş Kasım mahallesinde sâkin Abdülbâkī Çelebi b. ( ) el-Hammâmî mahfil-i kazâda işbu hâmilü’l-kitâb Ali Reis b. Receb mahzarında üzerine takrîr-i da‘vâ edip mezbûr Ali Reis’e târih-i kitâbdan bir sene mukaddem mudârebe tarîkiyle on altı bin akçe verip meblağ-ı mezbûrdan ba‘de külli hesâb zimmetinde bâkī bin akçe hakkım kalmış idi, suâl olunup meblağ-ı mezbûr alıverilmek matlûbumdur dedikde gıbbe’s-suâl mezbûr Ali Reis cevâbında fi’l-vâki‘ mudârebe tarîkiyle on altı bin akçe ahz ve kabz edip meblağ-ı mezbûrun mukaddemâ on beş bin akçesin bir def‘a mezbûr Abdülbâkī Çelebi’ye edâ edip ba‘dehû on beş gün mukaddem bir def‘a kendi nemâsıyla beş bin akçe dahi Yemiş iskelesi’nde verip cem‘an yirmi bin akçe verip fesh-i akd eylediğimizde mâ‘adâdan zimmetini ibrâ ve iskāt eylemiş idi deyicek mezbûr Abdülbâkī Çelebi vech-i meşrûh üzre ibrâyı münkir olmağla mudârib-i mezbûr Ali Reis’den cevâbına mutâbık beyyine taleb olundukda udûl-i müslimînden Osman b. Mehmed ve el-Hâc Ali b. Abdülkerim nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-vâki‘ mezbûr Ali Reis târih-i kitâbdan on beş gün mukaddem Yemiş iskelesi’nde bizim huzûrumuzda mezbûr Abdülbâkī Çelebi’ye mukaddemâ verdiği on beş bin akçeden mâ‘adâ beş bin akçe dahi verip nemâsıyla cem‘an yirmi bin akçe olmak üzre mezbûr Abdülbâkī Çelebi mezbûr Ali Reis’in mâ‘adâdan zimmetini ibrâ eylemişidi bu husûsa şâhidleriz şehâdet dahi ederiz dediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle hükm birle mâ vaka‘a ketb olundu. Fi’l-yevmi’s-sâbi‘ min Recebi’l-ferd li sene seb‘a ve erba‘în ve elf. Şuhûdü’l-hâl: Mustafa b. Mahmud, Mahmud b. Ahmed, Mustafa b. Veli, Cafer b. Abdullah, Receb Efendi ve gayruhüm.