Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 204 Hüküm no: 226 Orijinal metin no: [37b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmi bt. Abdullah’ın Âlime bt. Şeyh Sinan’dan ödünç aldığı eşya konusunda anlaşmaya varması Medîne-i Hazret-i Ebî Eyyûb el-Ensârî mahallâtından Câmi‘-i Kebîr mahallesinde sâkine Âlime bt. Şeyh Sinan nâm hâtun mahfil-i kazâda medîne-i mezbûre mahallâtından Otakçılar mahallesinde sâkine işbu bâ‘isetü’l-kitâb Esmâ bt. Abdullah tarafından ikrâr-ı âti’z-zikri tasdîka hasm-ı câhid mahzarında nehc-i şer‘î üzre vekâleti sâbite olan Abdi Çelebi b. Mustafa mahzarında ikrâr-ı tâm ve takrîr-i kelâm edip mezbûre Esmâ târih-i kitâbdan beş ay mukaddem bin akçe kıymetli bir cedîd dârâyî mâî zenne kaftan ve dört yüz elli akçe kıymetli üç ayaklı incili bir çift altın küpe ve yüz akçe kıymetli bir münakkaş duvar makraması ve yine dört yüz akçe kıymetli bir mâî tâbî kaftan benden isti‘âre ve ahz ve kabz edip ziyâde meks etmeğin te‘addîsi sebebi ile yedinde helâk olmağla da‘vâ ve taleb eylediğimde inkâr etmeğin ben dahi isbât sadedinde iken aramıza muslihûn tavassut edip husûs-ı mezbûrdan beni yedi yüz elli nakd-i râyic fi’l-vakt fıddî akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı merkūm yedi yüz elli akçeyi yedinden bi’t-tamâm ve’l-kemâl ahz ve kabz eyleyip eşyâ-i mezbûreye müte‘allik da‘vâdan mezbûre Esmâ’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm eşyâ-i mezkûreye müte‘allik mezbûre Esmâ üzerine benden bi’l-asâle ve bi’l-vekâle da‘vâ sâdıra olursa lede’l-hükkâmi’l-kirâm mesmû‘a ve makbûle olmaya dedikde mukırra-i mezbûrenin ber vech-i meşrûh cârî ve sâdır olan ikrâr ve takrîrini vekîl-i mezbûr Abdi Çelebi vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Fî evâhiri Cumâdelâhire li sene seb‘a ve erba‘în ve elf. Şuhûdü’l-hâl: Zülfikār b. Abdullah, Mehmed b. Rıdvan, Ali b. Mustafa, Cafer b. Abdullah, Mustafa b. Veli.