Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 205 Hüküm no: 227 Orijinal metin no: [37b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Mehmed’in vakıf eve yaptığı masrafın keşfi Mahmiye-i Kostantıniyye hısnı ebvâbından Yenikapı hâricinde vâki‘ Merkez Efendi mahallesinde sâkin Mustafa b. Mehmed nâm kimesne mahfil-i kazâya gelip takrîr-i kelâm ve ta‘bîr ani’l-merâm edip mahalle-i mezbûrede vâki‘ iki tarafdan merhûm Merkez Efendi vakfı ve bir tarafdan Mustafa nâm kimesne mülkü ve taraf-ı râbi‘den tarîk-i âm ile mahdûd iki bâb tahtânî beyti ve bir sofayı ve zât-ı eşcâr-ı müsmire ve gayr-ı müsmire bahçeyi müştemil olup merhûme Mihriban nâm sâhibetü’l-hayr vakf ve hâsıl olan gallesini merhûm-ı mezbûr Merkez Efendi câmi‘-i şerîfinin şem‘ine ve îkād eder kayyımına şart eylediği menzil harâba müşrif olmağla mütevellîsi olan Mustafa Efendi nâm kimesne menzil-i mezbûru kendi malımdan ta‘mîr edip harc ve sarf eylediğim meblağ icâre-i mu‘acceleye mahsûb olup ve senede yüz yirmi akçe icâre-i müeccele dahi vermek üzre bana îcâr edip yedime vech-i meşrûh üzre temessük vermeğin ben dahi ta‘mîre muhtâc mevzi‘i ta‘mîr ve termîm eyledim ve taraf-ı şer‘den üzerine varılıp eylediğim ta‘mîr keşf ve müşâhede ve mesâha ve takvîm olunmak matlûbumdur dedikde savb-ı şer‘-i kavîmden mevlânâ Mustafa Efendi irsâl olunup ol dahi hâssa mi‘mârlarından üstâd Ahmed b. Abdullah ve zeyl-i kitâbda muharrerü’l-esâmî olan müslimîn ile menzil-i mezbûrun üzerine varıp keşf ve müşâhede eylediklerinde menzil-i mezbûrun meremmet olunan iki bâb tahtânî odasının sakfı ve içinin kireci sıvası ve önünde sofası ve sakfı tahta havlusu ve kenîfi ve sokak kapısı ve sâir meremmât-ı lâzımesi için ba‘de’l-mesâha ve’t-takvîm cem‘an beş bin beş yüz kırk dört akçe tahmîn ve takdîr olunup meremmât-ı merkūmenin meblağ-ı mezbûra tahammülü vardır, noksân ile ta‘mîr mümkün değildir deyû mi‘mâr-ı mezbûr ve sâir ahâlî-i vukūf icmâ‘ ve ittifâk ettiklerini mevlânâ-yı mezbûr mahallinde ketb ve tahrîr ba‘dehû meclis-i şer‘de alâ vukū‘ihî ihbâr ve takrîr etmeğin mâ vaka‘a ketb olundu. Hurrire fî evâhiri Cumâdelâhire li sene seb‘a ve erba‘în ve elf. Şuhûdü’l-hâl: Mustafa Halîfe b. İskender, Ali Çelebi b. ( ) el-Hammâmî, Mahmud b. Hüsam el-Müezzin, Mustafa b. Hasan, Muslihiddin Efendi b. ( ) el-İmâm, Ahmed Çelebi b. Bektaş, Mustafa b. Veli el-Muhzır ve gayruhüm.