Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 217 Hüküm no: 208 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dellâl Mustafa Beşe’nin ölümü durumunda ev eşyalarının satılıp karısı Timurhan bt. Abdullah’a olan borcun ödenmesi için Mehmed Beşe’yi vekil tayin ettiği Mahmiye-i İstanbul’da Çivizâde mahallesi sâkinlerinden Dellâl Mustafa Beşe b. Abdullah nâm kimesne tarafından husûs-ı âti’l-beyâna vekîl olduğu mahalle-i mezbûre sükkânından Mehmed Beşe b. Mustafa ve kapıcı Mehmed Çelebi b. Abdullah nâm kimesneler şehâdetleriyle şer‘an sâbit olan mahalle-i mezbûre İmâmı Hasan Efendi b. Habib nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de işbu bâ‘isü’l-kitâb Mehmed Bey b. Ahmed nâm kimesne mahzarında ikrâr ve takrîr-i kelâm edip müvekkil-i mezbûr Mustafa Beşe bi irâdeti’llâhi’l-meliki’l-müte‘âl dâr-ı fenâdan dâr-ı bekāya intikāl ve irtihâl eylediğinde emlâkinden bir köhne mâî ferâce ve bir köhne benefşi-i Kürdiye ve bir köhne mâî dolama ve bir köhne sarık ve bir köhne çakşır ve bir mâî çukaya kaplı köhne tilki kürkü bey‘ olunup semenlerinden ve nakid olan on beş kıt‘a riyâlî guruşdan zimmetinde zevcesi Timurhan bt. Abdullah nâm hâtunun mehr-i müeccelinden bâkī beş yüz akçe mehir deynini edâ ve bâkīden mezbûre Timurhan’ın hisse-i irsiyyesi ihrâc olundukdan sonra her ne kalırsa techîz ve tekfînine ve eyyâm-ı mu‘tâde de tabh-ı ta‘âm olunup fukarâya it‘âm olunmağa harc ve sarf oluna deyû vasiyyet edip tenfîzine mezbûr Mehmed Bey’i vasiyy-i muhtâr nasb ve ihtiyâr edip ol dahi vesâyet-i mezbûreyi kabûl eyledi ve müvekkil-i mezbûrun zevcesi mezbûre Timurhan ile mahalle-i mezbûrede sâkin oldukları menzil içinde eşyâ-i mezbûreden gayrı her ne var ise mezbûre Timurhanı’ndır dedi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Es-Sâbikūn.