Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 214 Hüküm no: 239 Orijinal metin no: [39b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nazire bt. Mustafa’nın Çatalca kazası köylerindeki çiftlik ve tarlalarını Himmet Bey’e sattığı Mahmiye-i İstanbul’da Odabaşı çarşısı kurbunda vâki‘ Çavuş mahallesinde sâkine Nazire bt. Mustafa nâm hâtun tarafından husûs-ı âti’z-zikri ikrâra vekîl olup, hasm-ı câhid mahzarında mezbûreyi ma‘rifet-i şer‘iyye ile ârifeyn olan Ahmed Bey b. Hüseyin ve Yusuf b. Abdullah şehâdetleri ile şer‘an vekâleti sâbite olan Mehmed Çelebi b. Ali nâm kimesne mahfil-i kazâda işbu Himmet Bey b. ( ) mahzarında bi’l-vekâle ikrâr-ı tâm ve takrîr-i kelâm edip müvekkile-i mezbûre Nazire sadrî oğlu Mehmed Çelebi b. Halil Bey’den bi hasebi’l-irsi’ş-şer‘î kendiye intikāl edip Havâss-ı Refî‘a kazâsı müzâfâtından Çatalca nâhiyesine tâbi‘ Yenice nâm karyede vâki‘ bir tarafı çeşme ve bir tarafı Âişe Hâtun bt. İskender vakfı ve bir tarafı buzağılık ve bir tarafı tarîk-i âm ile mahdûd çiftlik ta‘bîr olunur sekiz kirişli bir bâb kebîr ahırımı ve zikr olunan ahıra karîb dört gözlü çatma anbarını ve anbar üstünde binâ olunmuş sundurma ki ve der-anbar olan on müd alef ve bir buçuk müd buğday ve bir müd şa‘îri ve çiftlik-i mezbûrda mevcûd olan dokuz aded kara sığır öküzünü ve iki su sığırı öküzünü ve bir re’s su sığırı ineğini ve üç re’s kara sığır ineğini ve üç re’s kara sığır danası ve iki re’s kara sığır buzağısı ve altı aded saban demirini ve altı döğeni ve iki balta ve üç keser ve bir yularlı keseri ve üç mükemmel arabayı ve iki tırpanı ve üç bel ve iki kazmayı ve iki bakraç ve iki tas ve iki tencere ve iki sahan ve iki tava ve yedi kıt‘a fıçıyı ve bir döşek ve iki minder ve iki yasdık ve iki tekneyi ve el değirmenini ve beş re’s kaz ve on tavuk ve üç ördeği ve sekiz aded kovanı ve üç dirgen ve beş yaba ve bi’l-cümle mevcûd olan âlât-ı zirâ‘at ve âsiyâb-ı hırâseti ve yine Silivri nâhiyesine tâbi‘ Şahtoros nâm karye sınırında vâki‘ iki kıt‘a ma‘lûmü’l-hudûd mülk bağlarını mezbûr Himmet Bey’e tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile yirmi yedi bin beş yüz nakd-i râyic fi’l-vakt fıddî akçeye bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra oğlu müteveffâ-yı mezbûrun vefâtı ile mahlûl olup kendi nefsi için tefevvuz eylediği merhûm Sultan Bayezid-i Velî evkāfı arâzisinden olup, sekiz kıt‘ası karye-i mezbûre Yenice sınırında ve dört kıt‘ası Bigados nâm karye sınırında mevâzi‘-i müteferrikada vâki‘ tahmînen yirmi müd tohum istî‘âb eder tarlalarının dahi hâlâ hubûbât-ı mütenevvi‘adan mezâri‘ olan iki müd tohumu ile hakk-ı tasarrufunu, evkāf-ı mezbûre mütevellîsi ma‘rifetiyle on yedi bin beş yüz mezbûrü’n-na‘t akçe mukābelesinde tefvîz eyleyip ol dahi minvâl-i muharrer üzre tefevvuz ve kabûl eylediğinden sonra bedel-i tefvîz olan meblağ-ı mezbûr ile emlâk-i mezbûrenin semeni olan yirmi bin beş yüz akçe ki cem‘an kırk beş bin akçe eder bi’t-tamâm ve’l-kemâl yedinden ahz ve kabz eyledi ba‘de’l-yevm emlâk-i mezbûre mülk-i müşterâsı ve mezâri‘-i mezbûre dâhil-i taht-ı tasarrufu olmuşdur. Keyfe mâ yeşâ’ ve yahtâr mutasarrıf olsun dedikde vekîl-i mezbûrun vech-i muharrer üzre cârî olan ikrârını el-mukarru lehü’l-merkūm Himmet Bey vicâhen tasdîk ve vicâhen tahkīk edicek mâ vaka‘a ketb olundu. Fi’l-yevmi’l-hâmis aşer min Recebi’l-ferd li sene seb‘a ve erba‘în ve elf. Şuhûdü’l-hâl: Mustafa Efendi b. Ebûbekir el-İmâm, Mehmed Efendi b. ( ), Veli Beşe b. Hüseyin er-Râcil, Hasan Çelebi b. ( ), Receb Efendi b. Abdi, Ömer b. Abdullah.