Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 215 Hüküm no: 240 Orijinal metin no: [40a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli b. Mehmed’in Ali b. İbrahim’e olan borcunu ödemesi Mahmiye-i Kostantıniyye hısnı ebvâbından Odunkapısı hâricinde sâkin keresteci tâifesinden râfi‘ü’l-kitâb Ali b. İbrahim nâm kimesne meclis-i şer‘a Veli b. Mehmed nâm kimesneyi ihzâr ve mahzarında üzerine takrîr-i da‘vâ edip mezbûr Veli’ye târih-i kitâbdan altı ay mukaddem kendi menzilinde alâ tarîki’l-karzi’ş-şer‘î beş yüz akçe ba‘dehû yine bir def‘a medîne-i Eyüb’de vâki‘ Defterdâr medresesi önünde yedi yüz akçe cem‘an bin iki yüz akçe ikrâz ve teslîm eyledim suâl olunup şer‘an alıverilmek matlûbumdur dedikde gıbbe’s-suâl ve akībe’l-inkâr müdde‘î-i mezbûr Ali’nin müdde‘âsına mutâbık beyyine taleb olundukda, udûl-i müslimînden İsa Efendi b. Musa ve Eyüb b. Resûl nâm kimesneler li ecli’ş-şehâde meclis-i şer‘a hâzırân olup istişhâd olunduklarında, her biri edâ-i şehâdet-i şer‘iyye edip fi’l-vâki‘ târih-i kitâbdan altı ay mukaddem mezbûr Ali merkūm Veli’ye Defterdâr medresesi önünde bizim huzûrumuzda alâ tarîki’l-karz yedi yüz akçe vaz‘ ve teslîm eylediğinde mezbûr Veli beş yüz akçe dahi mukaddemâ merkūm Ali’den istikrâz ve kabz eylediğini ikrâr edip zimmetinde merkūm Ali’ye cem‘an bin iki yüz akçe deyni olduğunu ikrâr etmişidi husûs-ı mezbûra minvâl-i muharrer üzre şâhidleriz şehâdet dahi ederiz dediklerinde gıbbe ri‘âyeti şerâiti’l-kabûl şehâdetleri makbûle olmağın, meblağ-ı mezbûr bin iki yüz akçeyi merkūm Ali’ye edâya mezbûr Veli tenbîh olunup mâ vaka‘a bi’t-taleb ketb olundu. Fi’l-yevmi’r-râbi‘ aşer min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Mahmud b. Ahmed, Ali b. Mustafa, Yakub b. Kurd, Mustafa b. Veli, Cafer b. Abd[ullah], Mustafa Beşe b. Mahmud.