Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 215 Hüküm no: 241 Orijinal metin no: [40a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye bt. Âişe’nin Âişe bt. Mustafa’da olan alacağını varislerinden tahsil ettiği Medîne-i Hazret-i Ebî Eyyûb el-Ensârî mahallâtından Kara Süleyman Çelebi mahallesinde sâkine iken bundan akdem müteveffât olan Âişe Hâtun bt. Mustafa’nın zevci ve vârisi Ömer Dede b. Musa mahfil-i kazâda müteveffât-ı mezbûrenin tebennî eylediği Râziye bt. Ali nâm sagīrenin vâlidesi ve tesviye-i umûruna kıbel-i şer‘den mansûb vasîsi olan işbu bâ‘isetü’l-kitâb Âişe bt. Rıdvan nâm hâtun mahzarında ikrâr ve takrîr-i kelâm edip zevcim müteveffât-ı mezbûre Âişe zimmetinde sagīre-i mezbûre Râziye’nin iki bin beş yüz akçe hakkı olup hâl-i hayâtında meblağ-ı mezbûr iki bin beş yüz akçenin bin akçesine işbu hâzır bi’l-meclis olan bir Kelâm-ı şerîf ve bir zenne kahverengi Paris çuka ferâce ve bir al dârâyî kaftan ve bir arakiye ve bir beyaz yekbendli sîm çengel kuşak ediverip eşyâ-i merkūmeyi ve bâkī kalan bin beş yüz akçesini dahi hâlâ müteveffât-ı mezbûrenin terekesinden vasiyy-i mezbûre Âişe’ye bi’t-tamâm edâ ve teslîm eyledim dedikde mezbûr Ömer Dede’nin vech-i meşrûh üzre cârî olan ikrârını vasiyy-i merkūme Âişe bi’l-muvâcehe tasdîk ve eşyâ-i merkūme ile meblağ-ı mezbûr bin beş yüz akçeyi vesâyeti hasebiyle mezbûr Ömer Dede yedinden bi’t-tamâm alıp kabz ve tesellüm eylediğini bi’l-müşâfehe tahkīk etmeğin mâ vaka‘a gıbbe’t-taleb ketb olundu. Tahrîren fi’l-yevmi’s-sâbi‘ aşer min Şa‘bâni’l-mu‘azzam sene seb‘a ve erba‘în ve elf. Şuhûdü’l-hâl: Mahmud Halîfe b. Ali, Mahmud b. Yusuf, Şaban b. Halîfe b. Kenan, Mustafa b. Veli, Ali b. Mustafa, Abdullah b. Süleyman.