Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 216 Hüküm no: 242 Orijinal metin no: [40a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Abdullah’ın, Çobançeşme’de katledilen Arabacı Pavli’nin katili olduğu Husûs-ı âti’l-beyânın mahallinde tahrîri için savb-ı şer‘den mevlânâ Mustafa Efendi irsâl olunup ol dahi Havâss-ı Refî‘a müzâfâtından Çekmece-i Sagīr nâhiyesine tâbi‘ Fîruz nâm karyeye varıp zeyl-i kitâbda muharrerü’l-esâmî olan müslimîn mahzarlarında akd-i meclis-i şer‘ olundukda, karye-i mezbûrede vâki‘ Ahmed Efendi hâtunu Safiye Hâtun Çiftliği demekle ma‘rûf çiftlik kethüdâsı olan Ahmed b. Abdullah mahfil-i kazâda karye-i merkūmede çiftliği olan Lunka [Lanka]zâde demekle şehîr kıdvetü’l-ümerâ’i’l-kirâm Abdullah Bey b. el-merhûm Mustafa Paşa’nın çiftliği kethüdâsı olan Receb b. Sefer ve çiftlik hüddâmından Ali b. Abdullah ve Osman b. Ramazan ve Mehmed b. Osman ve Ferhad b. Abdullah ve abd-i memlûklerinden Dilâver ve Yuvan ve Şerif ve İşkok ve Marhos ve karye-i mezbûre ahâlîsinden Hüseyin b. Abdullah ve Sinan b. Abdullah ve Mehmed b. Abdullah ve Ahmed b. Abdullah ve Haydar b. Abdullah ve sâirleri muvâcehelerinde bi’t-tav‘i’s-sâf ikrâr ve i‘tirâf edip bundan akdem Küçükçekmece mukābelesinde Çobançeşmesi kurbunda katl olunan Pavli nâm arabacı zimmîyi işbu şehr-i Recebi’l-müreccebin on dokuzuncu vâki‘ olan isneyn gecesi ben katl eylemiş idim vechen mine’l-vücûh bâlâda esâmîleri mezkûr olan kimesnelerin ve sâirînin haber ve âgâhları ve alâka ve medhalleri yokdur dediğini mevlânâ-yı mezbûr mahallinde tahrîr, ba‘dehû gelip meclis-i şer‘de alâ vukū‘ihî ihbâr ve takrîr etmeğin mâ hüve’l-vâki‘ hıfzan li’l-makāl ketb ve imlâ olundu. Hurrire fî evâhiri Recebi’l-mürecceb li sene seb‘a ve erba‘în ve elf. Şuhûdü’l-hâl: Zahrü’l-emsâl Mustafa Çelebi b. Abdullah, üstâd Ömer Ağa b. Abdullah, Osman b. Mehmed er-Râcil, Receb b. Turâbî, Mustafa b. Mehmed.