Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 218 Hüküm no: 209 Orijinal metin no: [27b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mehmed’e ölen kocası Nişastacı Mehmed b. Abdullah’tan intikal eden nişasta ve aletleri Yusuf Beşe b. Ali’ye sattığı Mahmiye-i İstanbul’da Sultan Selim Hân -aleyhi’r-rahmetü ve’l-gufrân- câmi‘-i şerîfi ve ma‘bed-i latîfi kurbunda Çukurbostan mahallesi sâkinlerinden iken vefât eden nişastacı Mehmed b. Abdullah’ın verâseti zevce-i metrûke-i hâmili Âişe bt. Mehmed’e münhasıra olduğu şer‘an mütehakkik oldukdan sonra haml-i mezbûrun kıbel-i şer‘-i enverden mansûb vasîsi olup merkūme Âişe tarafından husûs-ı câ’i’l-beyâna vekîli olduğu nişastacılar kethüdâsı olup mahmiye-i mezbûrede Veled-i Karabaş mahallesi sâkinlerinden olan fahrü’l-akrân ve’l-ekfâ Halil Beşe b. Mirza ve mahmiye-i merkūmede Karabaş mahallesi sâkinlerinden Mumcu Murtaza Beşe b. Mustafa nâm kimesneler şehâdetleriyle sâbit olan Ali Beşe b. Mehmed nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda işbu bâ‘isü’l-kitâb Yusuf Beşe b. Abdullah nâm kimesne mahzarında vekâleten ve vesâyeten ikrâr ve takrîr-i kelâm edip tereke-i müteveffâ-yı mezbûrdan olup mahmiye-i mezbûrede Yenibahçe kurbunda Neslişah Sultan mahallesinde vâki‘ Mehmed b. Şaban nâm sagīrin nişastacı kârhânesinde mevcûd olan yedi yüz elli vakıyye a‘lâ nişastasını her vakıyyesi beşer akçeye olmak üzre üç bin yedi yüz elli akçeye ve bin vakıyye ednâ nişastasını dahi her vakıyyesi üçer akçeye olmak üzre üç bin akçeye ve zikr olunan kârhânede mevcûd beynimizde ma‘lûm yedi fıçı ve iki elek ve altı sergi ve sâir nişastacı tâifesine mahsûs beynimizde ma‘lûm âlât-ı lâzımeyi dört bin beş yüz elli akçeye merkūm Yusuf Beşe’ye bi safkatin vâhidetin bey‘ ve teslîm edip ol dahi iştirâ ve kabûl ve tesellüm eyledikden sonra mecmû‘ semenleri olan on bir bin üç yüz akçeyi vesâyet ve vekâletim hasebiyle mezbûr Yusuf Beşe yedinden tamâmen alıp kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Mustafa Efendi b. Ali el-İmâm, Mustafa Halîfe b. Mehmed el-Müezzin, Mehmed b. Sinan, Mustafa b. Mehmed, diğer Mustafa b. ( ).