Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 217 Hüküm no: 243 Orijinal metin no: [40a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hâcce Münevvere Hatun Vakfı menzilinin Şaban Halîfe b. Kenan’a tevcih edildiği Fahrü’l-müderrisîni’l-kirâm Mustafa Efendi b. İbrahim mahfil-i kazâda râfi‘-i hâze’l-kitâb sulehâdan Şaban Halîfe b. Kenan mahzarında bi tav‘ihî ikrâr ve i‘tirâf edip medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Bıçakçı mahallesinde vâki‘ lede’l-ahâlî ve’l-cîrân ma‘lûmü’l-hudûd olup merhûm Hâcce Münevvere Hâtun nâm sâhibü’l-hayrın vakf ve sâkin olan kimesne beher yevm vâkıf rûhiyçün üçer sûre-i İhlâs-ı şerîf ve bir Fâtiha-i şerîfe tilâvet etmek üzre ulemâ ve sulehâdan süknâya muhtâc olanlara şart eylediği menzil, ber mûceb-i şart-ı vâkıfe ilâ hâze’l-ân taht-ı tasarrufumda olup hâlâ menzil-i mezbûrda olan hakk-ı süknâmı hüsn-i ihtiyârımla mezbûr Şaban Halîfe’ye fâriğ oldum dedikde merkūm Şaban Halîfe dahi sulehâdan olup, meskene şiddet-i ihtiyâcı olmağın, menzil-i mezbûrun süknâsı minvâl-i meşrûh üzre mezkûr Şaban Halîfe’ye cânib-i şer‘den tevcîh olunup mâ hüve’l-vâki‘ ketb olundu. Hurrire fi’l-yevmi’s-sâlis aşer min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Mefharü’l-eimme Ömer Efendi b. el-merhûm Abdülkādir Efendi, Mahmud b. Receb el-İmâm, Abdurrahman Efendi b. Abdullah, Hasan Çelebi b. Mehmed, Mustafa b. Mehmed er-Râcil, Mustafa Çelebi b. ( ) el-Müezzin, Ali b. Abdullah er-Râcil, Abdullah Halîfe b. ( ) el-İmâm, Mehmed Çelebi b. Hasan.