Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 217 Hüküm no: 244 Orijinal metin no: [40b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ceyhun bt. Abdullah’ın yarım menzil hissesini Gülahmer bt. Abdullah’a sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Aşçıbaşı mahallesinde sâkine Ceyhun bt. Abdullah nâm hâtun tarafından bey‘-i âti’z-zikri ikrâra vekîl olup, vekâleti mezbûre Ceyhun’u ma‘rifet-i şer‘iyye ile ârifeyn olan Abdullah Halîfe b. Maden el-İmâm ve İsmail Çelebi b. Ahmed şehâdetleriyle sâbite olan Halil b. Yusu[f] nâm kimesne mahfil-i kazâda işbu hâmilet-i hâze’l-kitâb Gülahmer bt. Abdullah nâm Hâtun mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Ceyhun’un mahalle-i mezbûrede vâki‘ bir tarafdan Halil Beşe mülkü ve iki tarafdan tarîk-i âm ve bir tarafdan Hüseyin mülkü ile mahdûd bir bâb tahtânî beyti ve sofa ve bi’r-i mâyı ve zât-ı eşcâr-ı müsmire muhavvatayı müştemil olup mezbûre Gülahmer ile ale’l-iştirâki’s-seviy mülkleri olan menzilden müvekkilem mezbûre Ceyhun nısf hisse-i mu‘ayyenesini mezbûre Gülahmer’e fıddî nakd-i râyic fi’l-vakt üç bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semen-i mezbûr üç bin akçeyi mezbûr Gülahmer yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’z-zikr menzilin cümlesi mezbûre Gülahmer’in mülkü olmuşdur. Keyfe mâ teşâ’ ve tahtâr mutasarrıfe olsun dedikde vekîl-i mezbûr Halil cemî‘ ikrâr-ı meşrûhunda mezbûre Gülahmer vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’s-sâmin aşer min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Mustafa b. Evhad, İbrahim b. Mehmed, Yusuf b. Abdullah, Mehmed b. Abdullah, Mustafa el-Kayyım, Mahmud b. Ahmed, Ali b. Mustafa.