Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 218 Hüküm no: 245 Orijinal metin no: [40b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çiçekçi Hacı Yusuf Vakfı’ndan Bıçakçı Ferhad mahallesi mescidi imam ve müezzinine vazifelerinin verilmesi İşbu bâ‘isü’l-kitâb medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Bıçakçı Ferhad mahallesinde vâki‘ mescid-i şerîfin bi’l-fi‘l imâmı olan Mahmud Halîfe b. Receb ve müezzini olan Mehmed Halîfe b. Yusuf nâm kimesneler mahfil-i kazâda medîne-i mezbûre sâkinlerinden iken bundan akdem vefât eden merhûm Çiçekçi Hacı Yusuf’un on iki bin akçe nukūd-ı mevkūfesine bi’l-fi‘l mütevellî olan Hasan Çelebi b. Hüseyin mahzarında her biri takrîr-i kelâm edip vâkıf-ı mezbûr meblağ-ı merkūmu vakf edip tescîl-i şer‘î ettikde beher sene onu on bir akçe hesâbınca istirbâh ve istiğlâl olunup hâsıl olan ribhinden her senede muhâsebe harcına yüz akçe ve ihzâriyyesi için yirmi akçe ve mütevellîyesine dahi yevmî bir akçeden üç yüz altmış akçe ve zevcesi Kâmile bt. Abdullah nâm hâtuna dahi hayâtında oldukça yevmî ikişer akçeden yedi yüz yirmi akçe vazîfe ta‘yîn edip mezbûre Kâmile vefât eyledikden sonra beher yevm vazîfesi olan mebâliğ-i merkūm ikişer akçenin bir akçesine mahalle-i mezbûre imâmı mutasarrıf olup, mukābelesinde her gün ba‘de salâti’s-subh mihrâbda üç İhlâs-ı şerîf ve bir sûre-i Fâtiha tilâvet eyleye ve bir akçesine dahi mescid-i mezbûrda müezzin olan mutasarrıf olup mukābelesinde her gece ikāmet-i salât-ı işâ olunmazdan mukaddem mahfilde kezâlik üç İhlâs-ı şerîf ve bir sûre-i Fâtiha tilâvet edip sevâbını vâkıf-ı mezbûrun rûhuna hibe edeler deyû mukaddemâ vakfiye-i ma‘mûlün-bihâsında şart ve ta‘yîn edip hâlâ mezbûre Kâmile târih-i kitâb senesi Cumâdelâhiresi’nin on üçüncü günü vefât etmekle vâkıf-ı mezbûrun mütevellî-i merkūm yedinde mahfûz olan vakfiyesine nazar olunup mûcebiyle ba‘de’l-yevm vazîfe-i mu‘ayyene-i mezbûru bize edâ etmek üzre cânib-i şer‘-i kavîmden tenbîh olunması matlûbumuzdur dediklerinde vâkıf-ı merkūmun mütevellî-i mezkûr Hasan Çelebi yedinde mahfûz olan vakfiye-i ma‘mûlün-bihâsına nazar olundukda. vâkıf-ı mezbûr minvâl-i muharrer üzre şart ve ta‘yîn eylediği mastûr ve mukayyed olmağla, ber mûceb-i şart-ı vâkıf zikr olunan yevmî iki akçenin bir akçesine mahalle-i merkūme imâmına ve bir akçesini mescid-i mezbûre müezzinine edâ etmek üzre müteveffâ-yı merkūm Hasan Çelebi’ye cânib-i şer‘-i kavîmden tenbîh olunup, mâ hüve’l-vâki‘ gıbbe’t-taleb ketb olundu. Fi’l-yevmi’s-sâmin aşer min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Veli Bey b. ( ), Mahmud Bey b. Musa, Mahmud Bey b. Abdullah, Halil Bey b. Musa, Mahmud b. Mehmed, Cafer b. Abdullah, Mahmud b. Ahmed, Ali b. Mustafa, Mustafa b. Mehmed, Yakub b. Kurd, Muharrirü’l-hurûf Abdülkādir Efendi el-Eyyûbî.