Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 219 Hüküm no: 246 Orijinal metin no: [40b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tanaşi v. Niko’nun koyunlarını Yorgo ve Aleksandri’ye satıp bedelini tecil ettiği Çoban tâifesinden Tanaşi v. Niko nâm zimmî meclis-i şer‘-i hatîr-i lâzımü’t-tevkīrde râfi‘ân-ı hâze’l-kitâb Yorgo ve Aleksandri veledey Apostol nâm karındaş zimmîler muvâcehelerinde bi’t-tav‘i’s-sâf ikrâr ve i‘tirâf edip mezbûrân Yorgo ve Aleksandri’den bir re’si yüz yirmi sekizer akçeye olmak üzre otuz iki re’s koyunu dört bin doksan altı akçeye ve yine her re’si seksener akçeye olmak üzre on bir re’s koyunu sekiz yüz seksen akçeye cem‘an kırk üç re’s koyunu dört bin dokuz yüz yetmiş altı akçeye iştirâ ve kabz eylediğimden sonra mebâliğ-i mezbûr dört [bin] dokuz yüz yetmiş altı akçeyi mezbûrân Yorgo ve Aleksandri târih-i kitâbdan yüz yirmi gün tamâmına değin te’cîl eylemişlerdir dedikde mezbûr Tanaşi’nin vech-i meşrûh üzre cârî olan ikrârını merkūmân Yorgo ve Aleksandri bi’l-muvâcehe tasdîk ve meblağ-ı mezbûru merkūm Tanaşi’nin üzerine vech-i meşrûh üzre te’cîl eylediklerini tahkīk mâ vaka‘a gıbbe’t-taleb ketb olundu. Tahrîren fi’l-yevmi’l-ışrîn min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Mahmud b. Ahmed, Ali b. Mustafa, Mustafa b. Veli, Yakub b. Kurd, Cafer b. Abdullah ve gayruhüm.