Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 221 Hüküm no: 250 Orijinal metin no: [41a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgo v. Verana’nın menzilini Apostol v. İskarlet’e sattığı Vilâyet-i Rumeli’nde Yenişehir kazâsına tâbi‘ Kûhistan nâhiyesine tâbi‘ Azmakova nâm karye zimmîlerinden Yorgo v. Verana nâm zimmî mahfil-i kazâda işbu hâmilü’l-kitâb Apostol v. İskarlet nâm zimmî muvâcehesinde ikrâr-ı tâm ve takrîr-i kelâm edip karye-i merkūmede vâki‘ bir tarafı Franko v. Derakir mülkü ve bir tarafı Totoş ve bir tarafı Anko mülkü ve bir tarafı tarîk-i âm ile mahdûd olup iki bâb tahtânî odaları ve sofayı ve muhavvatayı zât eşcâr-ı müsmire ve gayr-ı müsmireyi müştemil olan mülk menzilimi, cümle tevâbi‘ ve levâhıkı ile mezbûr Apostol’e üç bin iki yüz nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzre [41b] iştirâ ve kabûl eyledikden sonra semeni olan meblağ-ı merkūm üç bin iki yüz akçeyi yedinden bi’t-tamâm ve’l-kemâl ahz ve kabz edip meblağ-ı mezbûru mahallinde zabt ve teslîme müşterî-i merkūm Apostol’ü taslît eyledim dedikde mukırr-ı merkūmu cemî‘ ikrâr-ı meşrûhunda mezbûr Apostol vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâlis ve’l-ışrîn min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Mustafa Beşe b. Mahmud, Baba Cafer b. Abdullah, Ali Beşe b. Abdullah, Zaharya v. Dimo, Korteş v. Yorgi, Yani v. Kosta.